Máýlen Áshimbaev Ulttyq mýzeı atrıýmynan alynyp tastalǵan Nursultan Nazarbaev músinine qatysty pikir bildirdi
ASTANA. KAZINFORM – Senat tóraǵasy Máýlen Áshimbaev Ulttyq mýzeı atrıýmynan Nursultan Nazarbaev músininiń alynýyna qatysty pikir bildirdi.
Senat tóraǵasy tilshiler suraǵyna jaýap berý kezinde Ulttyq mýzeıden (Nursultan Nazarbaevtyń) eskertkish alynǵanyn estimegenin aıtty.
«Sizderden estip jatyrmyn. Biz plenarlyq otyrysta boldyq. Jańalyqtardy áli kórmedik. Endi ondaı sheshim qabyldansa, Ulttyq mýzeıdiń basshylyǵynyń sheshimi shyǵar dep oılaımyn. Sondyqtan munda Ulttyq mýzeıdiń basshylyǵynyń ustanymdaryna sáıkes, ondaǵy ekspozıtsııalardy jańartýǵa baılanysty osyndaı sheshim qabyldaǵan shyǵar. Sondyqtan bul máselege baılanysty suraǵyńyzdy Ulttyq mýzeıge joldasańyz durys bolady», - dedi M. Áshimbaev.
Budan buryn habarlanǵandaı, Ulttyq mýzeı atrıýmynan Nursultan Nazarbaevtyń músini alynyp tastaldy.
«Eskertkishke keletin bolsaq, bul eksponat mýzeı múlki bolyp sanalady jáne atrıým tujyrymdamasynyń ózgerýine baılanysty mýzeı qorynda turaqty saqtaýda bolady. Mýzeıdiń damýyna qyzyǵýshylyq tanytyp, onyń is-sharalary, aktsııalary men kórmelerine nazar aýdaratyn qazaqstandyqtardyń, blogerler men jýrnalısterdiń ustanymy mýzeı qyzmetkerlerin qýantady. Mýzeı keńistiginde bolatyn aldaǵy ózgerister men jańartýlardy jáne kórme zaldarynyń kórkemdik-stıldik sheshimderin qalyń jurtshylyq joǵary baǵalaıdy dep senemiz», - deıdi Ulttyq mýzeı ókilderi.
