Máýlen Áshimbaev tsıfrlandyrýǵa bólingen aqshanyń tıimsiz ıgeriletinin synady

ASTANA. KAZINFORM – Senattyń jalpy otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev tsıfrlandyrý salasyndaǵy jetistikter týraly baıandama oqyǵan. Palata tóraǵasy Máýlen Áshimbaev baıandamada aıtylǵan kórsetkishter qazaqstandyqtardyń naqty ómir deńgeıimen sáıkespeıtinin synady.

«Tsıfrlandyrýdyń arqasynda ınvestıtsııa artty ma? Bazalyq turǵyda qarasaq, ınvestıtsııa kólemi quldyrap barady. Solaı emes pe? Prezıdent tapsyrmasy boıynsha ekonomıkalyq ósimdi 6 paıyzǵa jetkize aldyq pa? Jetkizgen joqpyz. Áleýmettik shyǵyndardy qysqarttyq pa? Joq, áleýmettik shyǵyndar artyp jatyr. Aýylǵa sapaly ınternet tarttyq pa? Joq, tartqan joqpyz. Saraptap qarasaq, siz aıtqan qurǵaq tsıfrlardyń keregi ne», - dedi Senat spıkeri.

Sondaı-aq, ol salaǵa bólingen aqshanyń tıimdi ıgerilip jatqanyna kúmán kóp bolýy oryndy ekenin aıtty.

«Tek sizdiń mınıstrlik boıynsha ǵana qarasaq ta qomaqty qarjy bólingen. Onyń syrtynda ákimdikter, ózge mınıstrlikter, ulttyq kompanııalar qarajat jumsaıdy. Tsıfrlandyrýǵa, onyń quraldaryn satyp alýǵa ketken qarajattyń bárin ıntegratsııalasaq, respýblıkalyq bıýdjettiń qomaqty bóligin alyp jatyr. Osy aqshanyń bárin qanshalyqty tıimdi ıgerip jatyrmyz degen suraq zańdy dep oılaımyn», - dedi Senat tóraǵasy.

Mınıstr salaǵa bólingen qarajattyń esebinen, Astana hub ortalyǵynyń mol jetistikke jetip jatqanyn, ІT qyzmetter eksportynyń óskenin, «elektrondy úkimet» jobasynyń jemisti iske asqanyn eske saldy.

«Jalpy, biz tsıfrlandyrýǵa qyrýar qarjy quıylyp jatqanyn joqqa shyǵarmaımyz. Biraq biz júrgizgen uzaq merzimdi saıasatqa kóz júgirtsek, negizi bul ınvestıtsııalardyń óz paıdasyn bere bastaǵanyn kórip otyrmyz. Men óz baıandamamda nebári 4-5 jyldyń ishinde eksporttyń jyldyq kólemi 30 mıllıonnan 500 mıllıon dollarǵa deıin óskenin aıttym. Mine, bul eksporttyq kiristi ártaraptandyrýǵa naqty úles bolyp esepteledi», - dedi Jaslan Mádıev.