Máýlen Áshimbaev Senat depýtattarynyń aldaǵy mindeti týraly pikir aıtty

ASTANA. KAZINFORM — Senat depýtattary Memleket basshysynyń elimizdi damytýǵa jáne Táýelsizdigimizdi nyǵaıtýǵa arnalǵan bastamalaryn tolyq qoldaı otyryp, olardy ilgeriletýge óz úlesin qosady. Bul týraly Senat tóraǵasy Máýlen Áshimbaev málim etti.

- Ózderińizge belgili, aptanyń basynda Memleket basshysy Qasym-Jomart Kemeluly Toqaevtyń tóraǵalyǵymen Ulttyq quryltaıdyń otyrysy ótti. Qalyptasqan dástúr boıynsha, alqaly jıynda elimizdiń bolashaǵyna yqpal etetin mańyzdy bastamalar kóterildi. Onyń ishinde, konstıtýtsııalyq jáne parlamenttik reformaǵa qatysty naqty usynystar aıtyldy. Atap aıtqanda, Prezıdentimiz bolashaq Parlamenttiń ataýy, qurylymy men ókilettigi boıynsha pikirin bildirdi. Sonymen qatar, qoǵamdyq-saıası jáne memlekettik bılik ınstıtýttaryn reformalaýdy kózdeıtin usynystaryn jarııalady. Olardyń qatarynda Halyq Keńesi jáne Vıtse-prezıdent sııaqty jańa ınstıtýttar bar. Osylaısha, Ulttyq quryltaıda Ádiletti Qazaqstannyń jańa konstıtýtsııalyq modeli aıqyndaldy dep aıtýǵa tolyq negiz bar, - dedi M. Áshimbaev Senattyń jalpy otyrysynda.

Onyń aıtýynsha, jıynda aıtylǵan barlyq bastamany Prezıdenttiń Jarlyǵymen qurylǵan arnaıy komıssııa saraptap, tıisti ózgerister toptamasyn ázirleıtin bolady. Keıinnen, bul qujat jalpyhalyqtyq referendýmǵa shyǵarylady.

- Bastamalardyń maqsaty – «Kúshti Prezıdent – yqpaldy Parlament – esep beretin Úkimet» qaǵıdatyna saı keletin berik ári ádil jańa saıası júıe qalyptastyrý. Óz kezeginde, Senat depýtattary Memleket basshysynyń elimizdi damytýǵa jáne Táýelsizdigimizdi nyǵaıtýǵa arnalǵan bastamalaryn tolyq qoldaı otyryp, olardy ilgerýletýge óz úlesin qosady. Sondaı-aq, zańnamalyq túzetýlerdi qajet etetin sheshimderdi ýaqtyly pysyqtaımyz. Osylaısha, múddeli taraptarmen birlese otyryp, el ıgiligine baǵyttalǵan qyzmetimizdi joǵary deńgeıde atqaramyz dep senemin, - dedi Senat tóraǵasy.

Budan buryn habarlanǵandaı, Prezıdent jańa Parlamentke «Quryltaı» degen ataý berýdi usyndy.