Máýlen Áshimbaev QazaqSham qazaqsha kontent jasaýshylar forýmyna qatysty
ASTANA. KAZINFORM – Senat Tóraǵasy Máýlen Áshimbaev Palatanyń bir top depýtatymen birge QazaqSham forýmyna qatysty. Onda Palata Spıkeri kreatıvti ındýstrııa salasyndaǵy jańa jobalarmen tanysty. Sondaı-aq qatysýshylarmen Memleket basshysy bastamashy bolǵan qazaq tilinde kontentter daıyndaý barysyn jáne osy baǵyttaǵy basqa da ózekti máselelerdi talqylady. Іs-sharada sondaı-aq kreatıvti ındýstrııa jáne otandyq medıa ókilderi boldy.
Óz sózinde Senat Tóraǵasy keıingi jyldarda elimizde kreatıvti ındýstrııa qarqyndy damyp kele jatqanyn atap ótti. El Prezıdenti Qasym-Jomart Toqaevtyń tapsyrmasymen atalǵan salany damytý úshin ınstıtýtsıonaldyq negiz qalyptasty. Mádenıet jáne aqparat mınıstrliginde arnaıy departament quryldy.
Sondaı-aq sektordy ári qaraı jetildirýge jáne memleket tarapynan qoldaýǵa arnalǵan naqty sharalar qabyldanyp jatqany aıtyldy. Atap aıtqanda, osy baǵytta eńbek etip júrgen azamattar úshin salyqtyq jeńildikter qarastyryldy. Sonyń nátıjesinde az ǵana ýaqyttyń ishinde kreatıvti ındýstrııa sýbektileri 8 paıyzǵa artty.
Sonymen qatar elimiz boıynsha tıisti ınfraqurylym qalyptastyrý úshin júıeli jumys qolǵa alynyp jatqany belgili. Bul baǵyt jańa keshendi sheshimder qajet etetini anyq.
«Prezıdentimiz Qasym-Jomart Kemeluly Toqaev Ulttyq quryltaıdyń úshinshi otyrysynda Qazaqstannyń mádenı tolqyny óńirlik jáne halyqaralyq deńgeıde keńinen tanyla bastaǵanyna nazar aýdardy. Qazirgi tańda ultymyzdyń zor jasampazdyq áleýeti kıno, mýzyka, ádebıet jáne ónerdiń basqa da salalarynda aıqyn kórinis taýyp keledi. Bul baǵytta elimizde talantty jastar kóp», - degen Palata Spıkeri forýmdy uıymdastyrýshylarǵa alǵys bildirdi.
Іs-shara barysynda qatysýshylar kreatıvti ındýstrııany tıimdi damytýǵa tıisti jaǵdaı qajet ekenin aıtyp, óz usynystaryn jetkizdi. Olardyń qatarynda quqyqtyq baza qalyptastyrý, salany memlekettik qoldaý, ónimderdi kommertsııalandyrýǵa járdemdesý, óńirlerde kreatıvti jobalardy damytý sııaqty tyń bastamalar bar.
«QazaqSham forýmy – qazaq tilinde kontent daıyndaý aıasynda memlekettiń, bıznestiń, shyǵarmashyl tulǵalardyń jáne bilim berý mekemeleriniń kúsh-jigerin biriktire otyryp, kreatıvti ındýstrııanyń ózekti máselelerin talqylaıtyn, sondaı-aq, ony sapaly jańa deńgeıge shyǵarýǵa múmkindik beretin alań.Bul bastama jańa úzdik jobalarmen tanysýǵa, kontentmeıkerlerdiń ózara tájirıbe almasýyna, memlekettik tildegi mazmundy arttyrý tásilderin saralaýǵa jol ashady. Ózderińiz baıqaǵandaı, atqaratyn jumys az emes. Osy rette sizderdiń ár bastamalaryńyz ben usynystaryńyz mańyzdy. Aldaǵy ýaqytta kreatıvti ındýstrııaǵa qyzyǵýshylar kóbeıip, forýmǵa qatysýshylar qatary arta túsedi dep senemin», - degen Máýlen Áshimbaev kreatıvti ındýstrııa salasynda eńbek etip júrgen taraptardy sektordy ári qaraı damytý jolynda birlesip jumys isteýge shaqyrdy.
Forýmda kásipker, «Phenomenal Kids» jobasynyń negizin qalaýshy Azat Ábiken, tarıhshy, arheolog-eksperımentator Nurqoja Ersaıyn, prodıýser Azamat Demegen, «Balafunny» YouTube-arnasynyń negizin qalaýshy Altynaı Esenjanova, Mańǵystaý oblysyndaǵy «Aktown» jobasynyń negizin qalaýshy Nursultan Myrzabek, «Qonzhyq App» jobasynyń ókili Aınur Málibekova jáne basqa qatysýshylar sóz sóıledi.
Іs-sharanyń sońynda qatysýshy kompanııalar balalar arnalǵan ózekti taqyryptar jóninde qazaq tilinde kontent ázirleý jáne birlesip óndirý týraly memorandýmǵa qol qoıdy.
