Máýlen Áshimbaev: Memleket basshysynyń reformalarynyń negizinde adam jáne onyń múddeleri tur
ShYMKENT. KAZINFORM - Shymkentte Memleket basshysy Qasym-Jomart Toqaevtyń jańǵyrtý kún tártibine arnalǵan «Reformalar máni: Qazaqstannyń bolashaq tarıhynyń jeti taraýy» atty kitaptyń tanystyrylymy ótti. Іs-shara barysynda kitap avtory, memleket jáne qoǵam qaıratkeri Máýlen Áshimbaev óńirdiń ǵylymı jáne shyǵarmashylyq zııaly qaýym ókilderimen, sarapshylarmen jáne qoǵam belsendilerimen birge Memleket basshysynyń bastamasymen elimizde júzege asyrylyp jatqan saıası, ekonomıkalyq jáne áleýmettik ózgeristerdiń negizgi baǵyttaryn talqylady.
Sondaı-aq sapar aıasynda Máýlen Áshimbaev jergilikti bochcha federatsııasynyń ókilderimen jáne óńir jastarymen kezdesti.
Kitaptyń tanystyrylymy M.Áýezov atyndaǵy Ońtústik Qazaqstan zertteý ýnıversıtetinde ótti. Kezdesý barysynda avtor Memleket basshysy Qasym-Jomart Toqaevtyń bastamasymen júzege asyrylyp jatqan reformalardyń tarıhı mańyzy men el bolashaǵyna yqpaly týraly óz paıymyn ortaǵa saldy.
Kitapta memlekettik basqarýdy jańǵyrtý, saıası jáne ekonomıkalyq ózgerister, óńirlik damý, ulttyq biregeılik, sondaı-aq Qazaqstannyń halyqaralyq arenadaǵy orny men bedelin aıqyndaý máseleleri qarastyrylady.
Máýlen Áshimbaev óz sózinde Prezıdent reformalarynyń máni men mazmunyn ashatyn birqatar negizgi máselege toqtaldy.
-Ádiletti Qazaqstan» ıdeıasynyń túpki máni – «memleket memleket úshin» degen túsinikten «memleket adam úshin» qaǵıdatyna túbegeıli bet burý. El damýynyń jańa paradıgmasynyń negizinde adam jáne onyń múddeleri tur. Bul ustanym jańa Konstıtýtsııada naqty kóretilgen, – dedi Máýlen Áshimbaev.
Avtor Konstıtýtsııada bekitilgen qundylyqtar elimizdiń uzaq merzimdi damý maqsattaryn aıqyndaıtynyn da atap ótti.
Sonymen qatar kezdesýge qatysýshylar eldiń tehnologııalyq áleýetin nyǵaıtý jáne tsıfrlyq damýdyń jańa múmkindikterin tıimdi paıdalaný máselelerin talqylady. Máýlen Áshimbaevtyń aıtýynsha, jahandyq ózgerister Qazaqstan úshin jańa múmkindikterge jol ashady. Mundaı jaǵdaıda álemde bolyp jatqan úderisterden shet qalmaı, olardyń belsendi qatysýshysyna aınalý mańyzdy.
Shymkentke sapary aıasynda Máýlen Áshimbaev «Metallýrg» sport keshenine baryp, óńirlik bochcha quramasynyń sportshylarymen kezdesti. Ol jattyǵý barysymen tanysyp, parasportshylarmen, múgedektigi bar balalardyń ata-analarymen jáne jattyqtyrýshylar quramymen ınklıýzııa mádenıetin ilgeriletý máselelerin talqylady.
Kezdesýde Máýlen Áshimbaev shymkenttik sportshylardyń jetistikterine toqtalyp, sońǵy eki jylda qalada bochcha sportymen aınalysýshylar sany edáýir artqanyna nazar aýdardy. Óńirlik komandanyń ókilderi respýblıkalyq jarystarǵa belsendi qatysyp, júldeli oryndarǵa ıe bolyp júr. Sondaı-aq, Shymkentte Inklıýzıvti sport ortalyǵynyń salynýy sportshylardyń turaqty jattyǵýyna jáne jarystarǵa daıyndalýyna qosymsha múmkindikter ashatyny aıtyldy.
-Aralaryńyzdan ulttyq quramanyń bolashaq músheleri men halyqaralyq jarystardyń jeńimpazdary shyǵatynyna senimdimin. Biz aldaǵy ýaqytta da sizderge qoldaý kórsete beremiz. Jattyqtyrýshylaryńyzben birlesip, el namysyn halyqaralyq arenada laıyqty qorǵaýlaryńyz úshin qajetti jaǵdaılar jasaý baǵytynda jumys isteımiz, – dedi Máýlen Áshimbaev.
Shymkentke sapar Dostyq úıinde Máýlen Áshimbaevtyń qala jastarymen kezdesýimen túıindeldi. Ashyq dıalog formatynda qatysýshylar Memleket basshysynyń bastamasymen júzege asyrylyp jatqan reformalardyń óskeleń urpaqqa beretin múmkindikterin, jastardyń eldegi ózgeristerge qatysýyn jáne qoǵam aldyndaǵy jaýapkershiligin talqylady.
Kezdesýde jastardyń el damýynyń jańa kezeńindegi róline erekshe mán berildi. Atap aıtqanda, qarqyndy tsıfrlandyrý men jasandy ıntellektini engizý jaǵdaıynda jas býynnyń jańa tehnologııalardy meńgerýi, óz áleýetin iske asyrýy jáne eldiń órkendeýine naqty úles qosýy mańyzdy ekeni sóz boldy.
Sonymen qatar óńir jastarynyń taldamalyq áleýetin nyǵaıtý máselelerine nazar aýdaryldy. Qatysýshylar Shymkent qalasynda Taldau ekojúıesiniń bilim berý jáne qoǵamdyq jobalaryna qyzyǵýshylyq bildirip, ony damytý jóninde óz oılarymen bólisti.
