Máýlen Áshimbaev máslıhat ókilderin zań shyǵarý jumystaryna belsendi atsalysýǵa shaqyrdy
ASTANA. KAZINFORM - Senat tóraǵasy Máýlen Áshimbaev Aqmola obylysynyń turǵyndarymen kezdesýlerdiń birinde jergilikti máslıhat ókilderin Parlamenttiń zań shyǵarý jumystaryna belsendi atsalysýǵa shaqyrdy.
Palata basshysy Máýlen Áshimbaev Aqmola oblysynyń jurtshylyǵymen, jergilikti aqsaqaldarmen, jastarmen jáne máslıhat depýtattarymen kezdesti. Senat tóraǵasy máslıhat depýtattarymen kezdesýde ekonomıkany keshendi túrde yryqtandyrýdyń negizgi basymdyqtaryna toqtaldy.
«El ekonomıkasyn damytýda jáne elordany aýyl sharýashylyǵy ónimderimen qamtamasyz etýde Aqmola oblysynyń mańyzy aıryqsha zor. Óńirde turǵyn úıler men áleýmettik nysandardyń, onyń ishinde, aýyldyq jerlerde mektepterdiń qurylysy qarqyndy júrgizilip jatyr. Degenmen aımaqta jetistiktermen qatar, sheshimin kútken problemalar da bar. Ásirese, ınjenerlik jáne energetıkalyq ınfraqurylymdy jańǵyrtý máselesi óte ózekti. Şýchınski-Býrabaı demalys aımaǵynda ekologııalyq túıtkilder de joq emes. Biz óńirlerdiń múddesin qorǵaıtyn Palata retinde osy baǵyttarda máslıhattarmen baılanysty arttyryp, mańyzdy máselelerdi sheshýge yqpal etemiz», – dedi Máýlen Áshimbaev.
Sondaı-aq ol oblystyń máslıhat depýtattaryn zań shyǵarý jumysyna, parlamenttik tyńdaýlar, úkimet saǵattary, dóńgelek ústelder men kóshpeli otyrystar sııaqty palata uıymdastyratyn is-sharalarǵa belsendi qatysýǵa shaqyrdy.
Máýlen Áshimbaev Memleket basshysynyń tapsyrmasymen qurylǵan Ornyqty damý maqsattary jónindegi Parlamenttik komıssııanyń jáne Jergilikti ókildi organdarmen ózara is-qımyl jónindegi keńes, «Óńir» depýtattyq toby sekildi Senat janyndaǵy alańdardyń jumysyna nazar aýdaryp, bul baǵyttar boıynsha da yntymaqtastyqty arttyrýǵa múmkindik mol ekenin aıtty.
Oblystyń belsendi jastarymen kezdesýde reformalardy iske asyrýda jáne aımaqtyń áleýetin arttyrýda jas býynnyń atqaratyn róli talqylandy. Senat Tóraǵasy óz sózinde qazirgi tańda elimizde jastarǵa júıeli túrde qoldaý kórsetilip kele jatqanyn, osy baǵytta keshendi reformalar iske asyrylyp, strategııalyq baǵdarlamalar jáne memlekettik jobalar ázirlengenin atap ótti.
«Memleket basshysynyń bastamasymen Qazaqstanda jastardyń sapaly bilim alýyna, olardy baspanamen qamtamasyz etýge jáne qyzmette ósýine barlyq jaǵdaı jasalyp keledi. Óńir jastarynyń kásipkerlik bastamalaryna kómek kórsetý jáne olardy jumyspen qamtý máselelerin júıeli sheshý baǵytynda da irgeli ister atqarylyp jatyr. Prezıdenttik jastar kadrlyq rezerviniń arqasynda talantty, bilimdi, bilikti jas mamandarǵa jaýapty qyzmetterge kelýdiń jańa bir joly ashyldy. Aldaǵy ýaqytta Aqmola oblysynda da jergilikti kadrlyq rezervke irikteý bastalady. Oblys jastary óńirdiń ǵana emes, tutas elimizdiń damýyna úlken úles qosady dep senemin», – degen Máýlen Áshimbaev Májilis jáne máslıhat depýtattarynyń qatarynda jastardyń bolýyn qamtamasyz etetin zańnamalyq normalarǵa da toqtalyp ótti.
Palata Spıkeri Senatta belsendi jastardy qoldaýǵa arnalǵan Taldaý mektebi, Jas sarapshylar klýby sııaqty naqty jobalar qolǵa alynǵanyn da tilge tıek etti.
