Máýlen Áshimbaev Kostenko shahtasynda opat bolǵan kenshilerdiń týǵan-týystaryna kóńil aıtty

Senat tóraǵasy Máýlen Áshimbaev Kostenko shahtasynda opat bolǵan kenshilerdiń týǵan-týystaryna kóńil aıtty, dep habarlaıdy Kazinform.

«Qaraǵandy oblysyndaǵy Kostenko shahtasynda bolǵan tótenshe jaǵdaı bárimizdiń qabyrǵamyzdy qaıystyryp ketti. Apat saldarynan qaza tapqan kenshilerdiń otbasylary men jaqyndaryna kóńil aıtamyz. Sondaı-aq, zardap shekkenderdiń tezirek saýyǵyp ketýlerine tilektestigimizdi bildiremiz. Memleket basshysy bul jaǵdaıdy tikeleı óz baqylaýyna alyp, Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa qurylyp, tıisti jumystar bastalyp ketkenin de atap ótken jón», - dep jazdy Senat spıkeri Facebook paraqshasynda.

Sonymen qatar Máýlen Áshimbaev Prezıdentimiz Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrǵanyn atap ótedi.

«Elimizdiń Bas prokýratýrasy da sotqa deıingi tergep-tekserý jumystaryn bastap ketkeni belgili. Aldaǵy ýaqytta qolǵa alynǵan sharalar óz nátıjesin berip, kináliler zań júzinde jaýapqa tartylady dep senemiz jáne mundaı tótenshe oqıǵalar endi eshqashan qaıtalanbasyn dep tileımiz», - dedi ol.