Máýlen Áshimbaev: Qorǵanys kásiporyndary memlekettiń menshiginde bolýy kerek
Senat tóraǵasy Máýlen Áshimbaev memlekettik qorǵanys kásiporyndaryn jekeshelendirý jóninde pikir bildirdi, dep habarlaıdy Kazinform.
Senat depýtattary ulttyq zańnamaǵa qaýipsizdikti qamtamasyz etý jáne arnaýly memorgandaryndaǵy qyzmet máselesi boıynsha ózgeris engizýdi kózdeıtin zańdy eki oqylymda talqylap jatyr.
Atalmysh zań jobasynda qorǵanys-ónerkásip keshenindegi strategııalyq obektiler tizbesin qalyptastyrý, memleket menshigindegi kásiporyndardy «altyn aktsııa» úlesi saqtalǵan jaǵdaıda jekeshelendirýge ruqsat etý normalary usynylǵan.
Palata tóraǵasy Máýlen Áshimbaev atalmysh zańdaǵy qujattyń osy bóligine pikir bildirdi.
«Jalpy memlekettik qorǵanys kásiporyndarynyń jaǵdaıyna baılanysty biraz suraqtar bar. Bizde «Qazınjınırıng» degen kompanııa jumys istep jatyr. Ony bárimiz bilemiz. Bir onshaqty zaýyty bar. Biraq solardyń memlekettik organdar tarapynan tapsyrys alý máselesinde kóptegen túıtkilder bar ekeni jasyryn emes. Bular - memlekettiń qorǵanys áleýetine úles qosyp júrgen kásiporyndar. Bizge olardy qoldaýdyń bir qalybyn, formatyn tabý kerek. Eger memleketke ondaı kásiporyndar kerek bolmasa, «bizge ol kerek emes, shetelden satyp alamyz» dep ashyq aıtý kerek. Oǵan jetkizýge bolmaıdy ǵoı. Ózimizde qorǵanys kásiporyndary bolýy kerek. Bul — ulttyq qaýipsizdik máselesi. Biz olar memlekettiń menshiginde bolýy kerek dep sanaımyz. Sol sebepti osyndaı kásiporyndardy qoldaýdyń bir júıeli tetikteri kerek ekeni anyq. Sizderge osy máseleni bizdiń halyqaralyq ister, qorǵanys jáne qaýipsizdik komıtetimen birge pysyqtap, zań aıasynda qandaı múmkindikter bar ekenin anyqtaý kerek dep esepteımiz. Zańǵa memlekettik kásiporyndardy qoldaý baǵytynda ózgeris engizý kerek bolsa, ol jaǵyn depýtattarmen qarastyrýǵa daıynbyz. Biraq sizderden naqty pozıtsııa, ustanym kerek. Eger bizdiń ustanymymyz bolmasa, ol kásiporyndar ózimen-ózi júretin bolsa, memlekettik tapsyrys ózimen-ózi qalyptasyp jatatyn bolsa, júıeli jumys bolmaıtyny anyq. Sol sebepti osy baǵyttaǵy jumysty jańa deńgeıge shyǵarasyzdar dep senemiz. Biz birge jumys isteýge daıynbyz», — dedi Máýlen Áshimbaev.
