Máýlen Áshimbaev Konstıtýtsııa kúniniń ózgerýine qatysty pikir aıtty

ASTANA. KAZINFORM – Senat tóraǵasy Máýlen Áshimbaev Ata zań kúniniń ózgerýine qatysty pikir aıtty.

Atap aıtqanda, Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy. 

Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady. 

- Jańa Konstıtýtsııa qabyldanǵan kún elimizde mereke retinde atalyp ótetini belgilengen. Sondyqtan Ata zań (referendýmda) qabyldansa, onda mereke kúni ózgeredi, - dedi Máýlen Áshimbaev Senatta tilshiler suraǵyna jaýap bere otyryp. 

Osy oraıda referendýmda halyq qoldasa, onda 15 naýryz Ata zań kúni retinde bilgilenedi. Aıta keteıik, qoldanystaǵy Konstıtýtsııa kúni tamyz aıynda toılanyp keledi. 

Budan buryn habarlanǵandaı, jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda, Ata zańnyń naqty qashan kúshine enetini anyq jazylǵan. 

Jańa Konstıtýtsııa jobasynyń «Qorytyndy jáne ótpeli erejeler» dep atalatyn sońǵy bóliminiń 94-baby 1-tarmaǵyna sáıkes, respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady.