Máýlen Áshimbaev Qytaımen vızasyz rejım elimizge qalaı áser etetinin aıtty

Senat tóraǵasy Máýlen Áshimbaev Qazaqstan men Qytaı arasyndaǵy vızasyz rejım qandaı múmkindikter beretinin aıtty, dep habarlaıdy Kazinform. 

«Jalpy, elimizdiń biraz kásipkeri Qytaıǵa jıi saparlaıdy. Shyǵyn jáne orta, iri bıznes iskerlik qarym-qatynastaryn nyǵaıtyp jatyr. Ásirese, shaǵyn bıznespen aınalysatyndar úshin Qytaıǵa saparlaý, seriktesterimen jumys isteý, tıisti sharttardy bekitý, júkterdi shyǵarý baǵytynda jumystary jeńildeıdi. Osyǵan deıin Qytaımen arada iskerlik baılanystary bar adamdar osy máseleni jıi kótergen bolatyn. Endi olarǵa tıisti jaǵdaı jasalyp otyr», - dedi M.Áshimbaev Senatta tilshiler suraǵyna jaýap bere otyryp.

Onyń aıtýynsha, elimizde kóptegen adam Qytaıdaǵy týystaryna, ıaǵnı qandastarymyzǵa, sondaı-aq osy elde oqýda júrgen balalaryna barǵysy keledi.

«Qytaıdaǵa tarıhı jerlerge barǵysy keletin týrıster de barshylyq. Sondyqtan bizdiń azamattar úshin jaǵdaı jasalyp otyr. Endi vızany kútip júrmeı, eshbir qosymsha ruqsat qujattarsyz kórshi elge saparlaı alady. Eki el arasynda bekitilgen kelisim Qazaqstan azamattaryna esh kedergisiz Qytaıǵa barýyna múmkindik ashady. Qazaqstan bekitken kez kelgen kelisim elimizdiń ulttyq múddesine saı keledi. Bul rette, bıznesti damytýǵa jáne qarapaıym adamdarǵa oń nátıjesi bolady dep sanaımyn», - dedi Senat tóraǵasy.

Aıta keteıik, bıyl 10 qarashada Qazaqstan men Qytaı Halyq Respýblıkasynyń Úkimeti arasyndaǵy vızalyq talaptardan ózara bosatý týraly kelisim kúshine endi. 

Syrtqy ister mınıstrligi baspasóz qyzmetiniń málimetinshe, osy kelisimniń 1-shi babyna sáıkes eki eldiń azamattary jeke isterdi, týrızmdi, em qabyldaýdy, halyqaralyq tasymaldardy, tranzıttik, sondaı-aq iskerlik maqsattardy júzege asyrý úshin vızalyq talaptardan bosatylady. Osy rette azamattardyń eki memleket aýmaǵynda bolý merzimi kúntizbelik 30 (otyz) kúnnen aspaıtyn merzimdegi kezeńge, al kúntizbelik 180 (júz seksen) kún ishinde jıyntyǵynda kúntizbelik 90 (toqsan) kúnnen aspaýy qajet.