Máýlen Áshimbaev Qazaqstanda bochchany damytýdyń basym baǵyttaryn belgilep berdi
ASTANA. KAZINFORM – Parlament Senatynyń tóraǵasy, Qazaqstan bochcha federatsııasynyń prezıdenti Máýlen Áshimbaev elimizde paralımpıadalyq bochchany odan ári damytýǵa arnalǵan otyrysqa qatysty.
Іs-sharada respýblıkalyq federatsııa men óńirlik ókildikterdiń birlesken jumysyn ári qaraı jandandyrý máseleleri jáne jańa jobalar talqylandy.
Óz sózinde Máýlen Áshimbaev Memleket basshysy Qasym-Jomart Toqaevtyń tapsyrmasy boıynsha elimizde ınklıýzıvti, kedergisiz orta jáne azamattarǵa teń múmkindikter qalyptastyrý baǵytynda keshendi sharalar qabyldanyp jatqanyn atap ótti. Óńirlerde bochcha federatsııalarynyń ashylýy jáne olardyń atalǵan sport túrin dáripteýge belsendi qatysýy osyndaı júıeli ári naqty jumystyń nátıjesi ekeni anyq.
«Óńirlerde jumysty odan ári jandandyrý parasportshylarymyzǵa kórsetiletin qoldaýdyń aıasyn keńeıtedi jáne bochchadan ulttyq quramaǵa irikteý júrgizýge oń yqpalyn tıgizedi. Byltyr elimizdiń Halyqaralyq bochcha federatsııasyna qosylýy arqyly aldymyzǵa qoıǵan maqsat-mindetterimiz aıqyndala tústi. Bul – bizdiń ortaq jumysymyzdyń nátıjesi. Federatsııa men óńirlik ókildikterdi damytýdyń aldaǵy tórt jylǵa arnalǵan biryńǵaı strategııasy bizdiń bochchashylarymyzǵa 2028 jyly Los-Andjeleste ótetin Paralımpıada oıyndaryna joldama alýǵa múmkindik beredi», – dedi Qazaqstan bochcha federatsııasynyń prezıdenti.
Máýlen Áshimbaev atap ótkendeı, alda bochchanyń mártebesin odan ári arttyrýǵa jáne sportshylardy daıarlaýǵa qatysty aýqymdy mindetter tur. Osyǵan oraı Respýblıkalyq bochcha federatsııasynyń basshysy Qazaqstanda atalǵan sport túrin damytýdyń úsh basym baǵytyn belgilep berdi.
«Aldymen, parasportshylarymyzdyń áleýetin arttyryp, olardyń jarysta joǵary nátıjelerge qol jetkizýine jáne halyqaralyq rekordtar ornatýyna qajetti jaǵdaı jasaý qajet. Trenıngter men halyqaralyq tájirıbeni zerdeleý arqyly jattyqtyrýshylar quramynyń biliktiligin arttyrý da asa mańyzdy. Ekinshi baǵyt – «Barshaǵa arnalǵan bochcha». Bul – múgedektigi bar azamattardy ortaǵa beıimdeýge yqpal etetin mańyzdy qadam. Sondaı-aq sporttaǵy ınklıýzıvti jáne ıntegratsııalanǵan tásildiń jarqyn kórinisi. Osylaısha bochchanyń ártúrli toptaǵy adamdar úshin qoljetimdi ekenin dáripteımiz. Úshinshiden, óńirlerde bochchany damytýdyń mańyzy zor. Osy baǵytta óńirlik federatsııalar úlken ról atqarady dep senemin», – dedi Máýlen Áshimbaev.
Sonymen qatar otyrysqa qatysýshylar bochchany odan ári damytýǵa qatysty ózekti máselelerdi talqylady. Atap aıtqanda, federatsııalardy akkredıtteý, qarjylandyrý, ınfraqurylymdy jaqsartý jáne aqparattyq-aǵartý jumystaryn kúsheıtý jónindegi jumystar sóz boldy.
Otyrys barysynda Qazaqstan bochcha federatsııasynyń Bas hatshysy Nurgúl Óljekova óńirlik federatsııalardyń qyzmeti men josparlary týraly baıandama jasady.
Aıta keteıik, qazirgi tańda bochchadan ulttyq qurama sapynda elimizdiń 11 óńirinen (Astana, Almaty, Shymkent qalalary jáne Qaraǵandy, Pavlodar, Jetisý, Jambyl, Mańǵystaý, Abaı, Aqtóbe, Atyraý oblystary) 41 sportshy bar.
