Máýlen Áshimbaev kásipkerlerden salyqty aldyn ala jınap alýǵa qarsy shyqty
ASTANA. KAZINFORM — Senat tóraǵasy Máýlen Áshimbaev óńirlerdi jetkiliksiz qarjylandyrýǵa jáne transfertterge qatysty problemalar júıeli sıpatqa ıe ekenin aıtty. Bul eldiń ekonomıkalyq damýyna jáne jalpy makroekonomıkaǵa orasan zor zardabyn tıgizedi. Úkimettiń jáne Joǵary aýdıtorlyq palatanyń 2023 jylǵy respýblıkalyq bıýdjettiń atqarylýy týraly esebi qaralǵan Senat otyrysynda palata tóraǵasy osy máselege nazar aýdaryp, onyń sebepterine toqtaldy.
«Qazigi tańda bizdiń shyǵyndarymyz úlken. Al, kirister boıynsha problemalar bar. Byltyrǵy bıýdjet parametrleri QazMunaıGazǵa kelesi jylǵa salynatyn salyqtar boıynsha avanstyq tólemder esebinen ǵana jaqsy kórinip otyr. Budan bólek, byltyr eksporttaýshylarǵa 500 mıllıard teńge shamasynda qosymsha qun salyǵy qaıtarylǵan joq. Bul bizdiń salyq túsimderimizdiń tómendigin, qosymsha qun salyǵy men korporatıvti tabys salyǵy boıynsha shamadan tys nátıje kútetinimizdi kórsetedi. Bıýdjet shyǵyndary da jyl saıyn ósip otyr. Byltyr 2022 jylmen salystyrǵanda 21 paıyzǵa ósken», — dedi Máýlen Áshimbaev.
Senat tóraǵasynyń aıtýynsha, qalyptasqan jaǵdaıdy turaqtandyrý úshin shyǵystardy tabysqa jaqyndatý jáne kelesi jyldyń bıýdjeti aıasynda keıbir pozıtsııalardy ońtaılandyrý qajet.
Sondaı-aq táýekel qadamdardy jasaı bermeı, kásipkerlerden salyqtardy avanstyq jınaý sııaqty sharalardyń saldaryn aldyn ala zerdelegen jón.
«Shyn máninde, biz korporatıvti tabys salyǵyn qajetti deńgeıde jınaı almaımyz. Salyq bazasy joq, bıznestiń damý qarqyny da joǵary emes. Osyndaı jáne basqa da sebeptermen qosymsha qun salyǵyn da jınaı almaımyz. Sondyqtan shyǵyndardy azaıtý máselesin qaraǵan jón. Sol kezde ǵana teńgerimdi bıýdjetke qol jetkizemiz. Kásipkerlerden aldyn ala salyq tólemin alý olardy turalatyp, bızneste problemalar týyndatýy múmkin. Sol sebepti, shyǵyndardy qysqartý, olardy shynaıy baǵamdaý, salyqty aldyn ala almaý mańyzdy. Mundaı qadamdar barynsha ońtaıly bıýdjetke qol jetkizýge jol ashady», — dedi palata tóraǵasy.
Sonymen qatar Máýlen Áshimbaev shyǵystardyń ulǵaıýy qosymsha fıskaldyq júkteme týdyratynyn jáne ınflıatsııa deńgeıine áser etetinin, bul óz kezeginde áleýmettik salada birqatar problemalarǵa alyp keletinin aıtty.
«Shyǵyn neǵurlym kóp bolsa, ınflıatsııa da soǵurlym ulǵaıyp, baǵa ósedi. Onyń saldarynan áleýmettik máseleler týyndaıdy. Qazir paıyzdyq mólsherleme joǵary. Sondyqtan bıznesti qalypty mólsherlememen nesıelendire almaı otyrmyz, Bul ekonomıkanyń damýyna tusaý ekeni sózsiz. ıAǵnı, bıýdjetti teńgerimsiz etý arqyly makroekonomıkalyq túıtkilderge tap bolamyz», — dep Senat spıkeri depýtattyq korpýs pen Úkimetti osy baǵytta birlesip nátıjeli jumys isteýge shaqyrdy.
