Máýlen Áshimbaev halyqaralyq syılyqtyń qazylar alqasyna saılandy
ASTANA. KAZINFORM — Burynǵy Senat tóraǵasy Máýlen Áshimbaev Zaıd atyndaǵy halyqaralyq adamzat baýyrlastyǵy syılyǵynyń qazylar alqasynyń quramyna saılandy. Bul týraly Maksım Spotkaı óziniń Telegram paraqshasynda habarlady.
Maýlen Áshimbaev qazylar alqasynyń quramyna (Judging Committee) Mysyrdaǵy Ál-Azhardyń Bas ımamy Ahmad at-Taıebtiń usynysymen endi.
Qazylar alqasy músheleriniń mindeti — adamzat baýyrlastyǵy qundylyqtaryn óz ómiri men qyzmeti arqyly barynsha aıqyn kórsetken, sondaı-aq álemdegi adamdar men qaýymdastyqtarǵa úlgi bola alatyn tulǵalar men uıymdardy anyqtaý.
Zaıd atyndaǵy syılyq 2019 jyly Ál-Azhardyń Bas ımamy Ahmad at-Taıeb pen Rım Papasy Frantsısktiń kezdesýi nátıjesinde quryldy. Sol kezdesýde «Adamzat baýyrlastyǵy týraly qujatqa» qol qoıylǵan bolatyn. Syılyq Birikken Arab Ámirlikteriniń negizin qalaýshy sheıh Zaıd bın Sultan Ál Nahaıannyń qurmetine atalǵan.
Syılyqtyń uıymdastyrý komıtetinde atap ótkendeı, Prezıdent Qasym-Jomart Toqaevtyń basshylyǵymen Qazaqstan dıalog ornatý jáne halyqtar men mádenıetter arasynda kópir qalyptastyrý úshin bedeldi halyqaralyq alań retinde tanyldy.
Sondyqtan qazylar alqasynyń quramyna Qazaqstan ókiliniń enýi elimizdiń túrli dinder men mádenıetter ókilderiniń beıbit qatar ómir súrýi men ózara túsinistigin nyǵaıtýǵa qosqan úlesin aıqyndaı túsedi.
Buǵan deıin Senattyń eks-depýtattary qazir nemen aınalysyp júrgenin jazǵan edik.
