Parlamenttiń eki palatasynda da Frantsııamen dostyq toptary jumys isteıdi - Máýlen Áshimbaev
ASTANA. KAZINFORM – Parlament Senatynyń Tóraǵasy Máýlen Áshimbaev Frantsııanyń Qazaqstandaǵy Tótenshe jáne Ókiletti Elshisi Sılvan Gıogemen kezdesti.
Kezdesý barysynda Máýlen Áshimbaev dıplomatty taǵaıyndalýymen quttyqtap, Frantsııa Qazaqstannyń Eýropalyq Odaqtaǵy strategııalyq seriktesteriniń biri ekenin atap ótti. Suhbat kezinde eki el arasyndaǵy baılanysty nyǵaıtý isinde memleket basshylarynyń dostyq qarym-qatynasy eleýli ról atqaratyny, sonyń arqasynda búginde kóptegen salada mańyzdy kelisimderge qol jetkizilgeni aıtyldy.
«Qazirgi tańda Qazaqstan men Frantsııa arasynda eń joǵary deńgeıde syndarly saıası dıalog qalyptasty. Eki el Prezıdentteriniń ózara saparlary memleketterimizdiń yntymaqtastyǵyna tyń serpin berdi. Sonyń aıasynda strategııalyq seriktestikti nyǵaıtýǵa baǵyttalǵan Birlesken deklaratsııaǵa qol qoıyldy. Bizdiń Parlamenttiń eki Palatasynda da Frantsııamen dostyq toptary jumys isteıdi. Olardyń qyzmeti depýtattar arasyndaǵy yntymaqtastyqty arttyrýdyń mańyzdy tetigi ekeni anyq. Aldaǵy ýaqytta jumys toptarynyń áleýetin belsendi paıdalanǵan abzal», – dedi Máýlen Áshimbaev.
Kezdesýde saýda-ekonomıkalyq, ınvestıtsııalyq jáne ınfraqurylymdyq yntymaqtastyq máseleleri talqylandy. Taraptar klımattyq kún tártibine, energetıka salasyna, tsıfrlandyrý men jasandy ıntellektti damytýǵa qatysty birlesken mindetterdi de belgiledi.
Sonymen qatar Máýlen Áshimbaev Memleket basshysy Qasym-Jomart Toqaevtyń bastamasymen Qazaqstanda júrgizilip jatqan reformalarǵa toqtalyp ótti. Palata Spıkeri ornyqty damýǵa, ınklıýzıvti qoǵam qurýǵa, rýhanı dıplomatııany ilgeriletýge arnalǵan jobalar jóninde keńirek aıtyp, bıyl qyrkúıek aıynda ótetin Álemdik jáne dástúrli dinder kóshbasshylarynyń «Dinder dıalogy: bolashaq jolyndaǵy sınergııa» atty VIII Sezine nazar aýdardy.
Óz kezeginde Sılvan Gıoge Qazaqstannyń jahandyq syn-qaterlerdi eńserý, áleýmettik-ekonomıkalyq jáne saıası reformalardy iske asyrý jolyndaǵy tabandylyǵyn joǵary baǵalady.
Sondaı-aq ol Parlament Senatymen ekijaqty yntymaqtastyqty odan ári keńeıtýge múddeli ekenin bildirdi.
Keshe Máýlen Áshimbaev bochchadan respýblıkalyq týrnırdiń jeńimpazdaryn marapattaǵan.