Máýlen Áshimbaev: Egemendik – bizdiń eń basty qundylyǵymyz

Senat Tóraǵasy Máýlen Áshimbaev Qazaqstan halqyn Táýelsizdik kúnimen quttyqtady, dep habarlaıdy Kazinform.   

«Barshańyzdy Táýelsizdik kúnimen shyn júrekten quttyqtaımyn! Táýelsizdik kúni – memlekettilikti nyǵaıtatyn, otanshyldyqty arttyratyn jáne ultty uıystyratyn aıshyqty mereke. Sondyqtan bul datanyń mańyzy zor, máni erekshe. Egemendik – bizdiń eń basty qundylyǵymyz. Táýelsizdikke ońaılyqpen qol jetkizbegenimiz anyq. Sol sebepti búgingideı qasterli merekede biz azattyq jolynda basyn báıgege tikken arystarymyz ben erkindik úshin etigimen sý keshken aǵa býynnyń rýhyna taǵzym etemiz. Olardyń ǵıbratty ǵumyry men eńseli eldikke bastaǵan batyl qadamdaryn keńinen dáripteımiz. Bul – taýtulǵalarymyzdy máńgi jadymyzda saqtaý jáne Táýelsizdiktiń qadirin jete túsiný úshin asa mańyzdy», - dep jazdy Máýlen Áshimbaev Facebook-tegi paraqshasynda.

Senat Tóraǵasy qazirgi tańda Prezıdent Qasym-Jomart Toqaevtyń bastamasymen elimizde aýqymdy reformalar iske asyrylyp jatqanyn atap ótti. Onyń bári Táýelsizdikti saqtaý, Qazaqstandy ósip-órkendegen, damyǵan elge aınaldyrý jáne ádilettilik saltanat qurǵan memleket qalyptastyrý sııaqty mańyzdy mindetterge taban tireıdi.

«Osy jolda bárimiz judyryqtaı jumyla bilsek, shyn máninde, eldigimizdiń irgesi bekemdelip, eńsesi bıikteı túsedi. Barshańyzdy merekemen quttyqtaı otyryp, ár shańyraqqa shattyq, elimizge amandyq, jerimizge tynyshtyq tileımin! Táýelsizdigimiz tuǵyrly bolyp, rýhymyz asqaqtaı bersin!» - dedi Senat Tóraǵasy.