Máýlen Áshimbaev: Dıalog pen kelisim mádenıeti – jahandyq syn-qaterlerdi eńserýdiń kilti
ASTANA. KAZINFORM — Árbir memleket turaqtylyqty nyǵaıtýǵa jaýapkershilikpen qarap, dıalog pen kelisim mádenıetin ilgeriletý arqyly álemdik qaýipsizdikke óz úlesin qosýǵa tıis. Bul qaǵıdattyń jahandyq syn-qaterlerdi eńserýdegi róli týraly Senat tóraǵasy, Álemdik jáne dástúrli dinder lıderleri sezi hatshylyǵynyń basshysy Máýlen Áshimbaev Qogam News jobasyna bergen suhbatynda aıtty.
Máýlen Áshimbaevtyń aıtýynsha, búginde Álemdik jáne dástúrli dinder lıderleriniń sezi Qazaqstanǵa halyqaralyq qoǵamdastyqtaǵy qaýipsizdik pen turaqtylyqty qamtamasyz etýge úles qosýǵa múmkindik beretin tıimdi quraldardyń biri bolyp otyr.
«Sezd óziniń tıimdi halyqaralyq alań ekenin dáleldedi. Qazaqstan bul bastamany 20 jyldan astam ýaqyt boıy ilgeriletip keledi. Forýmnyń bastaýynda bolyp, onyń qalyptasyp, damýyna Prezıdentimiz Qasym-Jomart Kemeluly Toqaev úlken úles qosty. Búginde Sezdi álemniń basty rýhanı kóshbasshylary jınalatyn, tanymal ári bedeldi alań dep tolyq senimmen aıta alamyz», – dedi Álemdik jáne dástúrli dinder lıderleri sezi hatshylyǵynyń basshysy.
Onyń aıtýynsha, 2022 jyly ótken VII Sezd óziniń mazmunymen jáne qatysýshylardyń joǵary mártebesimen este qaldy. Oǵan qazirgi álemniń basty rýhanı kóshbasshylary – Rım Papasy Frantsısk pen Ál-Azhardyń Joǵarǵy ımamy sheıh Ahmed at-Taıeb qatysty.
«Rım Papasy Frantsısk teńdik ıdeıalaryn dáripteýge, halyqtyń áleýmettik osal toptarynyń quqyqtaryn qorǵaýǵazor úles qosty. Islam jáne hrıstıan álemderi arasyndaǵy ózara túsinistikti damytý baǵytynda mańyzdy máselelerge únemi nazar aýdaryp otyrdy. VII Sezd aıasynda ol Qazaqstandy dıalog pen kezdesý alańy retinde atap, halqymyzdyń ashyqtyǵy men áralýandyqtaǵy ózara qurmetin joǵary baǵalady. Sondaı-aq ıslam áleminiń bedeldi ortalyǵy Ál-Azhardyń Joǵarǵy ımamy sheıh Ahmed at-Taıeb te Sezge qatysty. Ol – qazirgi ıslam álemindegi asa syıly tulǵalardyń biri. Onyń osy saladaǵy irgeli eńbekteri kópke belgili. Sezde qazirgi zamanda dıalog aıryqsha mańyzǵa ıe ekenin atap ótti. Jalpy, VII Sezd álemdik dinder arasyndaǵy jaqyndasý, dıalog qurý mádenıetin dáripteýge tyń serpin bergen biregeı forým boldy. Sondyqtan biz VIII Sezden de mazmundy ári aýqymdy nátıje kútemiz», – dedi Máýlen Áshimbaev.
Aldaǵy forýmnyń kún tártibine toqtalǵan Máýlen Áshimbaev qazirgi zamannyń birqatar ózekti máselesine nazar aýdardy. Onyń aıtýynsha, atalǵan syn-qaterlerdi eńserýge rýhanı kóshbasshylar jumyldyrylady.
Aıta keteıik, buǵan deıin Senat tóraǵasy Qazaqstan men Ózbekstan qarym-qatynasynyń buryn-sońdy bolmaǵan bıik deńgeıge kóterilgenin aıtty.