Máýlen Áshimbaev depýtattarmen birge AES salý boıynsha referendýmǵa daıyndyq barysyn talqylady
ASTANA. KAZINFORM – Senat Tóraǵasy Máýlen Áshimbaev Palata Bıýrosynyń otyrysynda depýtattarmen birge AES salýǵa qatysty referendým aıasynda aqparattyq-túsindirý jumystaryn sapaly uıymdastyrý barysyn talqylady. Sondaı-aq jıynda 19 qyrkúıek kúni bolatyn Senat otyrysynyń kún tártibi jáne Palatanyń VIIІ shaqyrylymdaǵy Parlamenttiń ІІІ sessııasyna arnalǵan negizgi is-sharalar jospary bekitildi. Bul týraly QR Parlamenti Senatynyń baspasóz qyzmeti málim etti.
Máýlen Áshimbaev óz sózinde Memleket basshysynyń bastamasymen 6 qazanda elimizde AES salýǵa qatysty respýblıkalyq referendým ótetinine nazar aýdardy. Sonyń aıasynda qurylǵan Halyq shtabynyń qyzmetine senatorlar da belsendi qatysyp, óńirlerge barady. Olar halyqpen kezdesip, referendýmnyń mánin jáne atom elektr stansasyn salýdyń mańyzyn túsindirý jumystaryna atsalysady.
«Senatorlar osy aptada AES salýǵa qatysty respýblıkalyq referendým ótkizý aıasynda aqparattyq-túsindirý jumystaryn júrgizý úshin óńirlerge barady. Qazirgi tańda osy másele boıynsha Halyq shtaby qurylyp, jumysyn bastap ketti. Onyń quramynda Senat depýtattary da bar. Osyǵan baılanysty biz óńirlerge baryp, azamattarmen kezdesip, halyqqa AES salý máselesi jóninde jan-jaqty aqparat berý jumystaryna qatysamyz», – dedi Palata Tóraǵasy.
Bekitilgen kún tártibine sáıkes Senattyń aldaǵy otyrysynda depýtattar «Qazaqstan Respýblıkasynyń keıbir zańnamalyq aktilerine jekelegen kólik quraldary túrleriniń júrýin uıymdastyrý jáne jol qaýipsizdigin tsıfrlandyrý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine jekelegen kólik quraldary túrleriniń júrýin uıymdastyrý jáne jol qaýipsizdigin tsıfrlandyrý máseleleri boıynsha ózgerister men tolyqtyrýlar engizý týraly» zańdardy birinshi oqylymda qaraıdy.
Zańdardyń maqsaty – jol qozǵalysyn uıymdastyrý, kólik quraldarynyń jekelegen túrleriniń qozǵalysyn baqylaýdy júzege asyrý, belgilengen qozǵalys jyldamdyǵynan asyp ketkeni úshin ákimshilik quqyq buzýshylyqtardyń jańa quramdaryn belgileý, sondaı-aq birqatar naqtylaýshy túzetýler engizý máseleleri boıynsha zańnamany odan ári jetildirý.
Boljamdy normalar tsıfrlyq tehnologııalardy, tehnıkalyq quraldardy paıdalaný bóliginde ákimshilik is júrgizý protsesin ońtaılandyrýǵa baǵyttalǵan. Moped júrgizýshilerine qoıylatyn talaptardy engizý jáne olardy mehanıkalyq tehnıkalyq quraldardyń júrgizýshilerimen teń dárejede ákimshilik jaýapkershilikke tartý bóliginde «Jol qozǵalysy týraly» zańnyń normalaryna sáıkes keltirý máseleleri de nazarǵa alyndy.
Sonymen qatar Bıýro otyrysynda Májilisten kelip túsken zańdar jumys úshin turaqty Komıtetterge bólinip berildi.
