Máýlen Áshimbaev bolashaq qyzmeti jaıynda: bul — aldaǵy ýaqyttyń enshisindegi másele

ASTANA. KAZINFORM — Senat tóraǵasy Máýlen Áshimbaev bir palataly Parlament qurylǵan jaǵdaıda, qaı salada jumys isteýi múmkindigine qatysty suraqqa jaýap berdi. 

— Bul endi aldaǵy ýaqyttyń enshisindegi másele. Qazirgi meniń quzyretim — Prezıdenttiń sheshimimen anyqtalady, ıaǵnı Prezıdenttiń kvotasy aıasynda taǵaıyndalǵan senatormyn. Sondyqtan bizdiń negizgi maqsatymyz — Memleket basshysynyń kótergen barlyq bastamasyn júzege asyrý úshin tıisti zańdardy qabyldaý, — dedi Máýlen Áshimbaev Senattyń jalpy otyrysynan keıin tilshiler suraǵyna jaýap bere otyryp.

Osy oraıda ol Tsıfrlyq kodeks, Qurylys kodeksi, bankter týraly zań bar ekenin atap ótti.

— Bul turǵyda áriptesterimniń maqsaty — osy zańdardy sapaly deńgeıde qabyldaý. Atap aıtqanda, depýtattar osy mańyzdy zańdardy talqylap jatyr, — dedi Senat tóraǵasy.

Aıta keteıik, 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady.