Máýlen Áshimbaev: Bochchany damytý — ınklıýzııa mádenıetin qalyptastyrý jolyndaǵy ozyq úlgi
ASTANA.KAZINFORM — Parlament Senatynyń Tóraǵasy, Qazaqstan bochcha federatsııasynyń Prezıdenti Máýlen Áshimbaev Federatsııa sportshylarymen jáne jattyqtyrýshy qurammen kezdesti. Suhbat kezinde bıyl atqarylǵan jumys qorytyndylanyp, 2025 jylǵa josparlanǵan jarystarǵa daıyndyq barysy jáne aldaǵy mańyzdy mindetter talqylandy.
Máýlen Áshimbaev bochchany serik etken jas sportshylarǵa iltıpat bildire kelip, olardyń osy jylda ótken jarystarda sheberlik tanytqanyn jáne atletterdiń tabandylyǵy men joǵary deńgeıdegi erik-jigerin aıryqsha atap ótti. Sondaı-aq ol Memleket basshysy ınklıýzıvti qoǵam qurýǵa basa mán berip, tıisti organdarǵa naqty mindetter júktegenin tilge tıek etti.
— Prezıdentimiz Qasym-Jomart Kemeluly Toqaev ınklıýzıvti qoǵam qurýdy jáne Ádiletti Qazaqstan qalyptastyrýdy memlekettik saıasattyń negizgi basymdyǵy retinde belgilep berdi. Osy rette bochchany damytý elimizde yntymaqtastyq, ózara túsinistik jáne ınklıýzııa mádenıetin qalyptastyrý jolyndaǵy ozyq úlgilerdiń biri ekeni anyq. Bochchanyń paralımpıadalyq sport túri ekenin eskersek, bizdiń paraatletterimiz úshin aldaǵy ýaqytta álemdik iri saıystarǵa qatysýǵa múmkindik mol. Sizderdiń tabandylyqtaryńyz ben erik-jigerlerińiz árdaıym jarqyn jeńisterge jeteleıdi senemin, — dedi Senat Spıkeri.
Sonymen qatar Máýlen Áshimbaev Qazaqstan bochcha federatsııasynyń qyzmetin qorytyndylap, aldaǵy jumys josparyna toqtaldy. Onyń aıtýynsha, otandyq parasportshylardyń irgeli jarystardaǵy jeńisteriniń arqasynda ótip bara jatqan jyl tabysty boldy.
Atap aıtqanda, bıyl bochchadan ashyq respýblıkalyq týrnır, Qazaqstan chempıonaty men el Kýbogy úshin jarystar jáne birneshe mańyzdy is-shara uıymdastyryldy. Sondaı-aq jattyqtyrýshylar men tóreshiler resmı attestatsııalaýdan ótkizildi. Bul sportshylardy halyqaralyq standarttar boıynsha jattyqtyrýǵa jol ashady. Odan bólek, bochchadan ulttyq quramanyń quramy jańartyldy.
— Sportshylarymyz otandyq jáne álemdik jarystarda belsendilik tanyta bildi. Osy rette bochchadan halyqaralyq chellendjerlerdi erekshe atap ótkim keledi. Sol saıystarda Qazaqstan quramasy aıtarlyqtaı nátıjelerge qol jetkizdi. Sondaı-aq elimizde bochchashylar qaýymdastyǵynyń damý qarqyny kóńil qýantady. Qazirgi tańda 20 óńirdiń 11-inde bochcha úıirmeleri resmı túrde jumys istep keledi. Aldaǵy ýaqytta búkil eldi qamtýdy josparlap otyrmyz. Taǵy bir aıta keter jaıt, 12 paraatletimiz «Qazaqstan Respýblıkasynyń sport sheberi» atandy. Jasóspirimder qatarynan taǵy 10 atlet sport sheberine úmitkerler sanatyna qosyldy. Kelesi jyly Astana Boccia Challenger iri halyqaralyq týrnıri ótedi. 20-ǵa jýyq eldiń ókilderi qatysatyn bul saıys aldaǵy jyldyń basty oqıǵasy bolmaq, — dep, Máýlen Áshimbaev osyndaı aýqymdy jumystyń júıeli júrgizilýine belsendi atsalysyp, qoldaý kórsetip kele jatqan sportshylarǵa, ata-analarǵa jáne jattyqtyrýshylar men tóreshilerge alǵys bildirdi.
Aıta keteıik, bıyl Fınlıandııada ótken halyqaralyq jarysta qazaqstandyq bochchashylar jeke jáne komandalyq synda 3-oryn aldy. Bahreınde bolǵan iri týrnırdiń jekeleı synynda Almat Rehat kúmis medal enshilese, Itıana Shyńǵyshanova qola júldege qol jetkizdi. Sondaı-aq Rýslan Erembaev pen Elmıra Músirálıeva juptyq jarysta úshinshi orynnan kórindi. Al, Qýanysh Asqarbekov, Aleksandr Kýrmantaev jáne Itıana Shyńǵyshanova komandalyq saıysta jeńis tuǵyrynyń ekinshi satysyna jaıǵasqan edi.
Buǵan deıin habarlanǵandaı, Máýlen Áshimbaev Senattyń 2025 jyldaǵy negizgi mindetterin atady.