Máýlen Áshimbaev bochchadan respýblıkalyq týrnırdiń jeńimpazdaryn marapattady
ASTANA. KAZINFORM - Búgin Astanada bochchadan elimizdegi alǵashqy jattyqtyrýshy Sultanbek Orynbasarovty eske alýǵa arnalǵan dástúrli ashyq respýblıkalyq saıystyń fınaldyq kezeńi ótti.
J.Úshkempirov atyndaǵy jekpe-jek saraıynda uıymdastyrylǵan saıysqa Parlament Senatynyń tóraǵasy, Qazaqstan bochcha federatsııasynyń prezıdenti Máýlen Áshimbaev arnaıy baryp, jeńimpazdardy marpattady.
Máýlen Áshimbaev sportshylarǵa iltıpat bildire kelip, atalǵan sport túrinen Qazaqstandaǵy alǵashqy jattyqtyrýshy Sultanbek Orynbasarovtyń bochchany damytýǵa qosqan zor úlesine toqtaldy. Sultanbek Orynbasarov erekshe qajettilikteri bar balalardyń áleýetin júzege asyrýǵa jol ashyp, jas býyndy sport pen jetistikter álemine jeteledi. Jyl saıyn elimizde bochcha qaýymdastyǵyna qosylýǵa jáne jarystar men spartakıadalarǵa qatysýǵa nıet bildirýshilerdiń artyp kele jatqany, ata-analardyń erekshe qyzyǵýshylyǵy men óńirlerde Federatsııa fılıaldarynyń ashylýy osy sport túrine degen suranystyń joǵary deńgeıde ekenin kórsetedi.
Sonymen qatar Máýlen Áshimbaev ınklıýzıvti qoǵam qurýdyń mańyzyna jáne bul baǵytqa Memleket basshysy basa mán berip kele jatqanyna nazar aýdardy.
«Prezıdentimiz Qasym-Jomart Kemeluly Toqaev ár azamatqa teń múmkindikter beretin qoǵam qurýdyń mańyzdy ekenin árdaıym aıtyp keledi. Osy rette búgingi saıys erekshe mánge ıe. Óıtkeni bul týrnır bizdiń qoǵamda ınklıýzııa mádenıetin nasıhattaýǵa eseli eńbek sińirgen azamatty eske alýǵa arnalyp otyr. Sultanbek baýyrymyzdyń tabandylyǵynyń arqasynda Qazaqstanda bochcha qozǵalysy qarqyndy damı bastady. Búginde osy ıgi bastamanyń oń nátıjelerine bárimiz kýá bolyp otyrmyz. Bochcha – jaı parasport qana emes. Ol – úlken mádenıet jáne durys qundylyqtar júıesin dáripteıtin ınklıýzııa qozǵalysy. Sondaı-aq bul erekshe qajettilikteri bar balalardyń úlken ómirge beıimdelýine jol ashatyn mańyzdy ári kerekti tetik ekeni anyq», – dep, Máýlen Áshimbaev jarysqa qatysýshylarmen birge ata-analarǵa, jattyqtyrýshylarǵa jáne uıymdastyrýshylarǵa alǵys bildirdi.
Týrnır baǵdarlamasyna sáıkes sportshylar jeke, komandalyq jáne juptyq saıystarda baq synady. Jarystyń basty maqsaty – elimizdegi úzdik bochchısterdi anyqtaý jáne ınklıýzıvti qoǵam qurý, erekshe qajettilikteri bar azamattarǵa teń quqyqtar men múmkindikter qalyptastyrý baǵytynda atqarylyp jatqan jumystarǵa jurtshylyqtyń nazaryn aýdarý.
Saıys qorytyndysy boıynsha komandalyq jarysta birinshi oryndy Astana qalasy men Jetisý oblysynyń quramalary (Qýanysh Asqarbekov, Amanaı Bathanov, Merýert Tilebaldy) bólisti. Ekinshi oryndy elorda komandasy (Erhat Almat, Vıktorııa Shaıdýrova, Meıirbek Orazbek) enshilese, Batys Qazaqstan oblysynyń sportshylary (Gúlsezim Arystanǵalıeva, Nazerke Óteǵalıeva, Naýryzbek Nurbergen) úzdik úshtikti túıindedi.
VS3 dárejesindegi juptyq jarysta Jambyl oblysy men Astana qalasynyń quramalary top jardy. Astananyń taǵy bir juby ekinshi orynnan kórinse, úshinshi oryndy Jambyl jáne Jetisý oblystary bólisti.
VS4 dárejesindegi juptyq jarysta birinshi oryndy – Jetisý oblysynyń sportshylary (Madııar Muratqan, Aıym Muhametqan), ekinshi oryndy – Mańǵystaý oblysynyń juptyq komandasy (Táttimbet Teńelgenov, Áıgerim Tanysbaeva), úshinshi oryndy Jambyl oblysynyń komandasy (Rýslan Ǵaıbatov, Baljan Beısebaeva) jeńip aldy.
Aıta keteıik, bochchadan ashyq respýblıkalyq týrnır 5-10 naýryz aralyǵynda elordadaǵy «Aspan» sport kesheninde jáne J.Úshkempirov atyndaǵy jekpe-jek saraıynda ótti. Oǵan 130 sportshy qatysty. Bul kórsetkish byltyrǵydan eki esege jýyq kóp ekenin aıta ketken jón. Sportshylar elimizdiń 14 óńirinen keldi. Olardyń qatarynda Astana, Almaty jáne Shymkent qalalarymen birge Qaraǵandy, Atyraý, Pavlodar, Mańǵystaý, Jambyl, Jetisý jáne Abaı oblystarynyń ókilderi bar.
Týrnırdi Astana qalasy ákimdiginiń, ERG kompanııalar tobynyń jáne basqa da seriktester men demeýshilerdiń qoldaýymen Qazaqstan bochcha federatsııasy uıymdastyrdy.
Osyǵan deıin chempıondar lıgasy 1/8 fınalynyń qarymta oıyndary bastalatyny týraly jazdyq.