Máýlen Áshimbaev bochchadan elimizdiń paralımpıadalyq komandasymen kezdesti
Parlament Senatynyń Tóraǵasy – Qazaqstan bochcha federatsııasynyń prezıdenti Máýlen Áshimbaev Qytaıdyń Hanchjoý qalasynda ótken IV Azııa para oıyndaryna qatysqan elimizdiń paralımpıadalyq komandasymen kezdesti. Saıys qorytyndysy boıynsha, bochchadan Qazaqstan quramasy jalpykomandalyq esepte segizinshi orynǵa taban tiregen bolatyn, dep habarlaıdy Kazinform.
Senattyń baspasóz qyzmetiniń málimetinshe, Máýlen Áshimbaev qazaqstandyq bochchashylardyń alǵash ret Azııa para oıyndaryna qatysqanyn nazarǵa alyp, osyndaı deńgeıdegi iri dodada baq synaýdyń ózi aıtarlyqtaı jetistik ekenin tilge tıek etti. Qazaqstan quramasy Iran, Koreıa, Gonkong, Taıland, Japonııa jáne taǵy basqa elderdiń atletterimen synǵa tústi.
«Jarys jolynda sizder tabandylyq pen tózimdilik tanyta bildińizder. Azııa para oıyndaryna qatysý arqyly mol tájirıbe jınap, otandyq bochcha tarıhyndaǵy jańa kezeńge jol ashtyńyzdar. Jeńis degenimiz – qıyndyqtar men kedergilerdi eńserip, óz maqsattaryńa qol jetkizý. Qytaıdaǵy saıysta qarsylastardyń tájirıbeli quramalar bolǵany belgili. Sondyqtan jalpykomandalyq esepte segizinshi oryn alýdyń ózi aıtarlyqtaı nátıje. Biz osy saıysta ózimizdiń áli de bolsa jetildiretin tustarymyzdy anyqtap aldyq. Aldaǵy ýaqytta sol baǵyttar boıynsha jumys isteımiz», – degen Máýlen Áshimbaev sportshylarǵa, jattyqtyrýshylarǵa jáne únemi qoldaý kórsetip kele jatqan ata-analarǵa alǵys bildirdi.
Palata Tóraǵasy atap ótkendeı, Azııa para oıyndary elimizde paralımpıadalyq sport túrlerin damytýǵa tyń serpin berdi. Atalǵan jarysta Qazaqstannyń parasportshylary 41 júlde, ıaǵnı 8 altyn, 12 kúmis jáne 21 qola medal oljalap, jalpy esepte 11-orynnan kórindi.
Máýlen Áshimbaev qol jetkizgen jetistikpen toqtap qalmaı, kelesi saıystarda budan da joǵary nátıje kórsetý úshin jattyǵý jumystaryn júıeli túrde jalǵastyra berýdiń mańyzy zor ekenin aıtty. Sondaı-aq ol dál osyndaı tabandylyq pen tártip úlken jeńisterdiń kepili ekenine nazar aýdardy.
«Federatsııanyń josparyna sáıkes jeltoqsan aıynda bochchadan el kýbogy sarapqa salynady. Kelesi jyly taǵy alty saıys ótkizý kózdelip otyr. Sondyqtan qarqynymyzdy báseńdetýge esh negiz joq. Prezıdentimiz Qasym-Jomart Toqaev elimizde sport salasyn damytý úshin túbegeıli ózgerister qajet ekenin aıtty. Bul rette negizgi baǵyttardyń biri basqarý sapasyn jaqsartý, sondaı-aq Týrızm jáne sport mınıstrligi, Ulttyq olımpıadalyq komıtet jáne sport federatsııalary arasyndaǵy jumys úılesimdiligin arttyrý ekeni sózsiz. Osyǵan baılanysty Qazaqstan bochcha federatsııasy da jattyqtyrýshylar quramymen jumysty jetildiredi jáne oń nátıjelerge qol jetkizý jolynda basqa da sharalardy qabyldaıdy», – dedi Senat spıkeri.
Aıta keteıik, Azııa para oıyndarynda bochchadan baq synaǵan ulttyq qurama sapynda Meıirbek Orazbek, Qýanysh Asqarbekov, Itıana Shyńǵyshanova jáne Temirlan Altynsary boldy. Barlyq sportshymyz klassıfıkatsııadan sátti ótti jáne olarǵa halyqaralyq sanat berildi.
Sonymen qatar ótken aptada qazaqstandyq bochchashylar Grekııada uıymdastyrylǵan iri halyqaralyq saıysqa qatysty. Ol jerde otandasymyz Vıktor Kojevnıkov tórtinshi oryn aldy.
