Máýlen Áshimbaev atyraýlyq jastarmen ne týraly sóılesti
ASTANA. KAZINFORM - Senat tóraǵasy Máýlen Áshimbaev Atyraý oblysyna jumys sapary aıasynda óńirdiń belsendi jastarymen kezdesti. Basqosý S.Ótebaev atyndaǵy Atyraý munaı jáne gaz ýnıversıteti bazasyndaǵy Nurlan Balǵymbaev atyndaǵy kommýnıkatsııalardy damytý ortalyǵy alańynda ótti, dep habarlaıdy QR Ǵylym jáne bilim mınıstrliginiń baspasóz qyzmeti.
Kezdesý barysynda eldegi saıası reformalardyń júzege asyrylýy, jastardyń qoǵamdaǵy orny men jaýapkershiligi, bilim berý jáne kásibı damý máseleleri talqylandy. Máýlen Áshimbaev óz sózinde Atyraý óńiriniń Qazaqstan tarıhy men ekonomıkasyndaǵy aıryqsha mańyzyn atap ótti.
– Atyraý óńirinen qazaq rýhanııaty men mádenıetine ólsheýsiz úles qosqan tulǵalar shyqty. Sonymen birge táýelsizdik jyldarynda elimizdiń ekonomıkalyq damýyna da zor úles qosyp keledi. Qazaqstannyń munaı-gaz salasynyń negizgi bóligi osy óńirde ornalasqan. Sondyqtan Atyraýdyń búkil el ekonomıkasyndaǵy orny erekshe, – dedi Senat tóraǵasy.
Kezdesýde Memleket basshysy Qasym-Jomart Toqaev bastamasymen júzege asyrylyp jatqan saıası reformalarǵa erekshe nazar aýdaryldy. Máýlen Áshimbaev jańa Konstıtýtsııa táýelsizdik pen memlekettilikti nyǵaıtýǵa, ulttyq biregeılikti saqtaýǵa, memlekettik tildi damytýǵa, bilim men ǵylymdy strategııalyq basymdyq retinde bekitýge baǵyttalǵan mańyzdy qujat ekenin atap ótti.
Jastarmen ashyq formatta ótken kezdesýde kásibı biliktilik pen úzdiksiz bilim alýdyń mańyzyna da erekshe toqtaldy.
– Memleket jastarǵa jan-jaqty múmkindik jasap otyr. Endigi jerde sol múmkindikterdi tıimdi paıdalaný qajet. Ár jas óz salasynyń myqty mamany bolýǵa umtylýy kerek. Bilimin úzdiksiz jetildirip, zaman talabyna beıimdelýi qajet. Sonda ǵana elimizdiń damýyna úles qosa alady, – dedi Máýlen Áshimbaev.
Sondaı-aq Senat tóraǵasy jastardy «Taza Qazaqstan» bastamasyna, Prezıdenttik jastar kadr rezervi jobasyna jáne túrli bilim berý baǵdarlamalaryna belsendi qatysýǵa shaqyrdy.
Kezdesý barysynda Ádiletti Qazaqstandy qurý jolyndaǵy jastardyń róli erekshe ekeni aıtylyp, memleket tarapynan kórsetilip jatqan qoldaý sharalary men jańa býynnyń qundylyqtyq baǵdarlary sóz boldy. Osy rette Senat tóraǵasy Prezıdent Qasym-Jomart Toqaev usynǵan uly oıshyl Abaı Qunanbaıuly murasyna negizdelgen «Adal azamat» tujyrymdamasynyń mańyzyn atap ótti. Atalǵan tujyrymdama negizinde eńbekqorlyq, adaldyq, kásibı biliktilik, úzdiksiz bilim alý jáne otanshyldyq sekildi qundylyqtar jatyr. Bul qaǵıdattar elimizdiń bolashaǵyn qalyptastyratyn jas býyn úshin qundy baǵdar bolýǵa tıis.
Kezdesý sońynda jastar ózderin tolǵandyrǵan suraqtaryn qoıyp, el bolashaǵy, bilim berý múmkindikteri men qoǵamdyq bastamalarǵa qatysý máseleleri boıynsha pikir almasty.
Osyǵan deıin Qazaqstan men Frantsııa birlesip, bilim berý, jastardyń ózara tájirıbe almasýyna múmkindik jasaıtyny týraly jazdyq.
