Máýlen Áshimbaev Almaty qalasy máslıhatynyń depýtattarymen kezdesti
ALMATY. KAZINFORM – Senat Tóraǵasy Máýlen Áshimbaev Almaty qalasy máslıhatynyń depýtattarymen, QHA múshelerimen, jergilikti jurtshylyqpen jáne stýdenttermen kezdesti. Kezdesýler kezinde Memleket basshysy bergen tapsyrmalardyń shaharda oryndalý barysy, zań shyǵarý qyzmetindegi mindetter jáne Senat pen máslıhattardyń birlesken jumysynyń jańa formaty talqylandy. Sondaı-aq senatorlar «Astana Motors» zaýytynyń jańa blogynyń qurylysymen tanysty jáne óndiris ornynyń eńbek ujymymen atalǵan nysannyń damý perspektıvalaryn áńgimege arqaý etti.
Palata Spıkeri atap ótkendeı, Memleket basshysy Úkimettiń keńeıtilgen otyrysynda jáne Ulttyq quryltaıda belgilep bergen mindetterdi sapaly iske asyrý barlyq deńgeıdegi depýtattardyń keshendi ári júıeli ózara is-qımylyn talap etedi. Sondyqtan máslıhat depýtattarymen kezdesýde jergilikti ókildiń organdardy zań shyǵarý jumysyna jumyldyrý máselesine basa mán berildi. Mundaı qadam jańa ekonomıkalyq modelge kóshý aıasynda áleýmettik-ekonomıkalyq salany damytýǵa, agroónerkásiptik keshendi ilgeriletýge, sý resýrstaryn utymdy paıdalanýǵa jáne ınfraqurylymdy jetildirýge tyń serpin berýge tıis.
«Memleket basshysynyń Ekonomıkany yryqtandyrý jónindegi sharalar týraly Jarlyǵy ekonomıkany ártaraptandyrý jáne otandyq bıznes-ahýaldy jaqsartý úshin eldegi ekonomıkalyq reformalardy jedeldetýdi kózdeıdi. Ekonomıkalyq ósýdi yntalandyrý jolynda ınfraqurylymdy damytý aıryqsha mańyzǵa ıe. Bıyl elimizde jylý jelilerin jańǵyrtý, avtojoldardy rekonstrýktsııalaý jáne salý baǵytynda aýqymdy jumys júrgizilip jatyr. Áleýmettik az qamtylǵan sanattaǵy azamattar úshin jańa turǵyn úı baǵdarlamasy iske qosyldy. Osyndaı kezeńde ekonomıkada qurylymdyq ózgeristerdi dáıekti túrde júrgizý qajet. Bul rette onyń tıimdiligin arttyrý, otandyq óndirýshilerdi qoldaý, ekonomıkaǵa memlekettiń tikeleı qatysýyn qysqartý sııaqty mindetterdiń mańyzy zor. Osy baǵytta bárimiz birlesip, nátıjeli jumysymyzdy ári qaraı jalǵastyrýymyz kerek», - dedi Palata Tóraǵasy.
Sondaı-aq Máýlen Áshimbaev Almaty Qazaqstannyń iri qarjy jáne iskerlik ortalyǵy retinde eldiń ekonomıkalyq damýynda erekshe oryn alatynyn aıtty. Ol qalanyń áleýetin tolyq paıdalaný úshin barlyq múddeli tarap kúsh biriktirý qajet ekenin de tilge tıek etti. Alaıda, eleýli jetistikterge qaramastan, shahardyń damýyna jáne básekege qabilettiligine keri áserin tıgizetin máseleler de bar. Kezdesýde olardy sheshý joldary da sóz boldy.
Sonymen qatar sapar barysynda senatorlar Ál-Farabı atyndaǵy Qazaq Ulttyq ýnıversıtetiniń oqytýshylarymen jáne stýdentterimen kezdesti. Jıynǵa qatysýshylar Memleket basshysy Almatyda jas ǵalymdarmen kezdesý kezinde belgilep bergen mindetterge toqtaldy. Budan bólek is-sharada ǵylymı kadrlar daıarlaý, olardyń biliktiligin arttyrý, zertteý jobalaryna áleýmettik jáne qarjylyq qoldaý kórsetý, ınnovatsııalyq ádistemeler men tehnologııalardy engizý baǵyttary boıynsha usynystar aıtyldy.
Senat Tóraǵasy ǵasyrǵa jýyq tarıhy bar ýnıversıtet ultymyzdyń adamı kapıtalyn damytý jáne kadrlyq áleýetin nyǵaıtý jolynda tarıhı ról atqarǵanyn, sondaı-aq, ǵylym men ınnovatsııany damytýǵa úlken yqpal etip kele jatqanyn atap ótti.
«Prezıdent Qasym-Jomart Kemeluly Toqaevtyń bastamasymen Ádiletti Qazaqstan qurýǵa jáne azamattardyń ál-aýqatyn arttyrýǵa arnalǵan júıeli jumys atqarylyp jatyr. Osyndaı keshendi jańǵyrýlar aıasynda talantty, belsendi jastarǵa júıeli túrde qoldaý kórsetýge úlken kóńil bólinip keledi. Qazirgi tańda jastardyń sapaly bilim alýyna, olardyń ǵylymmen, shyǵarmashylyqpen, sportpen shuǵyldanýyna jáne jas mamandardy jumyspen qamtýǵa tıisti jaǵdaı jasalyp jatyr. Osy rette Ádiletti Qazaqstan qurý barshamyz úshin ortaq mindet ekenin túsinýimiz kerek. Onyń sátti iske asyrylýy ár azamattyń belsendiligine baılanysty. Jastar qaı kezeńde de jańǵyrýdyń qozǵaýshy kúshi ekeni belgili. Bul – úlken jaýapkershilik. Osy jolda árdaıym birlik pen yntymaq, ádildik pen jaýapkershilik, zań men tártip, eńbekqorlyq pen kásibı biliktilik sııaqty irgeli qundylyqtarǵa taban tireý qajet», - degen Máýlen Áshimbaev Memleket basshysynyń bastamasymen iske asyrylyp jatqan reformalar týraly da aıtyp ótti.
Almatyǵa sapar kezinde Senat Tóraǵasy Almaty qalasy ákimdiginiń ǵımaratyna bardy, sondaı-aq, QR TJM Seısmologııalyq baıqaý jáne zertteýler ulttyq ǵylymı ortalyǵynyń qyzmetimen tanysty. Odan bólek, Abaı atyndaǵy daryndy balalarǵa arnalǵan respýblıkalyq mamandandyrylǵan orta mektep-ınternatynyń qurylysyna arnalǵan jıynǵa qatysty jáne «Astana Motors» zaýytynyń jańadan salynyp jatqan blogymen tanysyp, ónerkásip ornynyń eńbek ujymymen kezdesti.
