Máýlen Áshimbaev AQSh kongresiniń senatorymen birqatar máseleni talqylady
ASTANA. KAZINFORM - Parlament Senatynyń Tóraǵasy Máýlen Áshimbaev AQSh kongresiniń senatory Stıv Deınspen kezdesti. Onda taraptar ekijaqty parlamentaralyq yntymaqtastyqty odan ári nyǵaıtý máselelerin talqylady.
Senattyń baspasóz qyzmetiniń málimetinshe, suhbat barysynda Qazaqstan-AQSh qarym-qatynasyn damytýda joǵary deńgeıdegi memleketaralyq turaqty saıası dıalogtyń yqpaly zor ekeni aıtyldy. Byltyr qyrkúıek aıynda eki eldiń Prezıdentteri Qasym-Jomart Toqaev pen Djo Baıden Nıý-Iorktegi BUU Bas Assambleıasy alańynda ótken S5+1 sammıti aıasynda kezdesken edi. Sondaı-aq ótken jyldyń aqpanynda AQSh-tyń Memlekettik hatshysy Entonı Blınken Qazaqstanǵa resmı saparmen kelgeni belgili. Kezdesýde kópjaqty jáne parlamentaralyq baılanysty damytý máselelerine de basa mán berildi.
«Eki eldiń Prezıdentteri ózara qarym-qatynasymyzdyń strategııalyq basymdyqtary men kún tártibin belgilep, Qazaqstan-Amerıka baılanysyn ári qaraı damytý úshin mańyzdy qadamdar jasady. Qazirgi tańda memleketterimiz arasynda qarqyndy saıası dıalog qalyptasqan. Saýda-ekonomıkalyq ózara is-qımyl da belsendi damyp keledi jáne aýqymdy sharttyq-quqyqtyq baza bar. Elderimizdiń lıderleri belgilep bergen tyǵyz yntymaqtastyq basqa salalarda, onyń ishinde zań shyǵarýshy organdar arasynda da joǵary deńgeıde qoldaý tabýǵa tıis», – dedi Máýlen Áshimbaev.
Sonymen qatar suhbattasýshylar Parlament depýtattarynyń saýda-ekonomıkalyq yntymaqtastyq baǵytyndaǵy birlesken jumysyn jáne basqa da máselelerdi talqylady. Senat Spıkeri Parlamenttiń Memleket basshysynyń bastamasymen qolǵa alynǵan reformalardy zańnamalyq turǵydan qamtamasyz etý baǵytyndaǵy jumysyna, sondaı-aq, Álemdik jáne dástúrli dinder lıderleri seziniń tujyrymdamasynyń iske asyrylý barysyna da toqtalyp ótti.
Óz kezeginde Stıv Deıns Qazaqstanda júrgizilgen keshendi jańǵyrýlardy joǵary baǵalady. Sondaı-aq senator bizdiń elde demokratııany damytýǵa, jańa ekonomıkalyq úlgige kóshýge jáne rýhanı dıplomatııany órkendetýge arnalǵan sharalardyń tıimdiligine nazar aýdaryp, ózara birlesken jumysty jandandyrýǵa beıil ekenin atap ótti.
