Máýlen Áshimbaevtyń depýtattyq ókilettigi merziminen buryn toqtatyldy
Jalpy otyrysyta atalǵan másele týraly QR Ortalyq saılaý komıssııasynyń múshesi Baqyt Meldeshov usynym engizgen bolatyn.
«QR Konstıtýtsııasynyń 52-baby 5-tarmaǵyna, «QR Parlamenti jáne onyń depýtattary mártebesi týraly» 1995 jylǵy 16 qazandaǵy konstıtýtsııalyq zańynyń 24-baby 3-tarmaǵyna sáıkes jáne ornynan túsý týraly ótinish negizinde Ortalyq saılaý komıssııasy QR Parlament Májilisiniń depýtaty Máýlen Saǵathanuly Áshimbaevty ókilettigin merziminen buryn toqtatý týraly sheshim úshin usynym engizip otyr», - dedi Baqyt Meldeshov.
Budan keıin Májilis Tóraǵasy Nurlan Nyǵmatýlın burynǵy áriptesine sáttilik tilep, alǵys hat tapsyrdy.
«Bizdiń Májiliste kóp jyldar Halyqaralyq qatynastar, qorǵanys jáne qaýipsizdik komıtetiniń tóraǵasy bolyp jumys jasadyńyz. Mańyzdy zańdardy qabyldaýǵa zor úles qostyńyz. Sonymen birge, parlamentaralyq baılanysty nyǵaıtýǵa da erekshe yqpal ettińiz. Sondyqtan, barlyq depýtattardyń atynan sizge alǵysymyzdy bildiremiz. Aldaǵy ýaqytta da partııalyq qyzmette zor tabystar tileımiz», - dedi Májilis Tóraǵasy.
Óz kezeginde sóz alǵan «Nur Otan» partııasy Tóraǵasynyń birinshi orynbasary Máýlen Áshimbaev kópshilikke alǵys aıtty.
«Birneshe jyl óte jaqsy, qoıan-qoltyq nátıjeli jumys istedik. Sizderdeı saıasatkerlermen, mamandarmen jumys isteý men úshin úlken mártebe. Ekinshi jaǵynan, Májilistegi jumys men úshin kásibı ári ómirlik mektep boldy. Endi Elbasy bizdiń partııamyzdaǵy laýazymdy qyzmetke taǵaıyndady. Bul úlken jaýapkershilik. Elbasynyń senimin aqtaýǵa bar kúshimdi salatyn bolamyn», - dedi Máýlen Áshimbaev.
Eske sala ketsek, 1 aqpan kúni Elbasy «Nur Otan» partııasy Tóraǵasynyń jańa birinshi orynbasaryn tanystyrǵan bolatyn.
