Máýlen Áshimbaev: Jumysta san emes, sapa bolsyn

ASTANA. QazAqparat - «Nur Otan» partııasy Tóraǵasynyń birinshi orynbasary Máýlen Áshimbaev elordalyq fılıaldyń aktıvimen kezdesýde Prezıdenttiń partııany jańǵyrtý jónindegi basty tapsyrmalary týraly aıtty, dep habarlaıdy QazAqparat tilshisi.

Máýlen Áshimbaevtyń aıtýynsha, Tóraǵanyń tapsyrmalaryn sapaly ári óz merziminde oryndaý úshin partııa músheleri ony demokratııalandyrý boıynsha úlken aýqymdaǵy jumystardy atqarýy tıis.

«Biz jumystyń formaty men ádisin ózgertýimiz kerek. «Nur Otannyń» qaǵazbastylyqqa qarsy qyzmetin júrgizip, adamdarǵa paıda ákeletin naqty sharalarǵa kóshýimiz kerek», - dedi Máýlen Áshimbaev.

 

Onyń sózine qaraǵanda, jańa ádister men tsıfrlyq tehnologııalardyń engizilýi aldymen jastarǵa, múmkindigi shekteýli jandarǵa, ardagerlerge, jalǵyzbasty zeınetkerlerge, shaǵyn jáne orta bıznes ókilderine kómek berýi kerek.

«Ótkiziletin sharadan naqty paıda bolýy tıis. San emes, sapa bolsyn. Keıbir josparlarda júzdegen, myńdaǵan shara belgilengen. Odan da az da bolsa sapaly, nátıje beretin sharalardy ótkizeıik. Adamdardy qınaǵan máselelerdi sheshýge kúsh salý qajet», - deıdi ol.

Máýlen Áshimbaev Memleket basshysynyń «Nur Otan» partııasy mınıstrlik nemese atqarýshy bılik emes, strategııalyq kúsh degen sózin eske saldy.

 

«Partııaǵa erekshe mıssııa - Qazaqstandy jańǵyrtýǵa júıeli túrde qatysatyn strategııalyq kúshke aınalý mindeti júktelgen. Biz Memleket basshysynyń nátıje úshin jumys isteıtin jasampaz ortalyqqa aınalýymyz kerek», - deıdi «Nur Otan» partııasy Tóraǵasynyń birinshi orynbasary.