Máýlen Áshimbaev jumys saparymen Qyzylorda oblysyna bardy
Máýlen Áshimbaev Syr óńiriniń jetistikteri men qarqyndy damýyn erekshe atap ótti.
«Qyzylorda oblysynyń ejelden beri ózindik dástúr-salty men mádenı qundylyqtary bar ekeni belgili. Búgin de aımaq qarqyndy damyp kele jatqanyn jańa qala qurylysynan, tsıfrlandyrý men kásipkerlik boıynsha júrgizilip jatqan jobalardan anyq kórýge bolady. Bul jumystardy Memleket basshysynyń Joldaýyna sáıkes naqty tapsyrmalar aıasynda jalǵastyrý kerek. Al partııanyń mindeti keń aýqymdy aqparattyq-nasıhat jumystaryn júrgize otyryp, iske asyrý joldaryn kórsetip, óńirlerdegi tapsyrmalardyń oryndalýyna baqylaý jasaý bolyp tabylady», - dedi «Nur Otan» partııasy Tóraǵasynyń birinshi orynbasary.
Óz kezeginde, Qyzylorda oblysynyń ákimi Qyrymbek Kósherbaev Elbasy Joldaýy aıasynda adamı kapıtaldy damytýdyń mańyzdylyǵyn atap ótti.
«Sarapshylardyń baǵalaýy boıynsha, Batys Eýropa elderinde adam kapıtalynyń jalpy ishki ónimdi qalyptastyrýǵa qosqan úlesi 30%, AQSh-ta 40%, TMD elderinde ol 10-15% quraıdy. Búginde áleýmettik-ekonomıkalyq damýdyń sapalyq sıpattamalary alǵa shyǵýda. Bul ósimniń arqasynda ekonomıkada ilgerileý baıqalady. Jalpy ishki ónim kórsetkishiniń ósýi joǵary tehnologııalyq óndiristerdiń - bilim berý, densaýlyq saqtaý, ǵylym jáne basqa da zııatkerlik qyzmetter esebinen júrýi tıis. Nátıjesinde áleýmettik-ekonomıkalyq júıeniń tıimdiligi artyp, eń bastysy ómir sapasy jaqsaryp keledi», - dep atap ótti oblys ákimi.
Sondaı-aq aktıv jıynynda Qorqyt ata atyndaǵy Qyzylorda memlekettik ýnıversıtetiniń rektory Qylyshbaı Bısenov bilim berý salasynda júzege asyrylyp jatqan jobalar týraly aıtty. Syrboıylyq 500-den astam túlek Máskeý men Sank-Peterbýrgtiń joǵary oqý oryndarynda oqyp jatyr. Aıta keteıik, mektep túlekteriniń 97 paıyzy JOO-lar men kolledjderde bilip alýda.
Kásipker Aıgúl Muhanbetjanova memlekettik qoldaý arqyly júzege asqan óz kásibi jaıly aıtyp berdi.
«Qazirgi tańda kásipkerlerge arnalǵan shaǵyn-orta bıznesti damytý úshin barlyq jaǵdaı jasalǵan. «Bıznestiń jol kartasy» baǵdarlamasy boıynsha nesıe alyp, kúıeýimmen birge shulyq tsehyn iske qostyq. Táýligine 400 jup shulyq daıyndap, osylaısha jergilikti ónim shyǵarýdamyz»,- deıdi kásipker.
Atap óteıik, 2018-2020 jyldardy óńirde jappaı kásipkerlikti damytýdyń úsh jyldyǵy dep jarııalady. Qazirgi tańda shaǵyn-orta bıznesti qarjylandyrý úshin oblystyq bıýdjetten 32 mlrd teńge, startap-jobalarǵa 3 mıllıardtan astam qarjy bólingen.
Jappaı kásipkerlikti damytý oblysta úsh mańyzdy máseleniń sheshim tabýyna: salyq bazasyn jaqsartýǵa, turǵyndardy jumyspen qamtýǵa jáne qoǵamdyq turaqtylyqty qamtamasyz etýge yqpal etetinin aımaq basshysy atap ótti.
«Jas Otan» jastar qanatynyń oblystyq fılıalynyń tóraǵasy Talǵat Tiles jastardyń bastamalaryna qoldaý kórsetý boıynsha aımaqta atqarylyp jatqan jumystar týraly baıandady. Qazirgi tańda Syrdarııanyń sol jaǵalaýynda zamanaýı jastarǵa qyzmet kórsetý ortalyǵy salynyp, jastar úshin barlyq jaǵdaı qarastyrylýda.
Oblys ákimdiginiń ǵımaratynda M.Áshimbaev Sıtýatsııalyq ortalyqtyń jumysymen tanysyp, Qyzylorda oblysynyń tájirıbesin respýblıka boıynsha taratý qajettigin aıtty.
Jumys saparynda «Nur Otan» partııasy Tóraǵasynyń birinshi orynbasary Syrdarııanyń sol jaǵalaýynan «7-20-25» baǵdarlamasymen salynyp jatqan turǵyn úı qurylysy nysandarymen tanysty. Atap óteıik, Qyzylorda oblysynda «Orda» turǵyn úımen qamtamasyz etýge arnalǵan «Jol kartasy» sheńberinde halyqtyń áleýmettik osal toptaryn qoljetimdi baspanamen qamtý josparlanýda.
Sonymen qatar, M.Áshimbaev sol jaǵalaýdaǵy jaqynda iske qosylǵan «Rýhanı jańǵyrý» ortalyǵynda boldy. Eske sala keteıik, Qyzylorda qalasynyń 200 jyldyq mereıtoıy aıasynda Syrdarııanyń sol jaǵalaýynan paıdalanýǵa berilgen alǵashqy nysan - «Rýhanı jańǵyrý» ortalyǵy men qalalyq murajaı ǵımaratynyń saltanatty ashylý rásimi ótken bolatyn. Bul nysan 1925 jyly ulttyń resmı «qazaq» atalýy týraly tarıhı sheshim qabyldanǵan Qazaq Ortalyq Atqarý komıtetiniń syzba-nusqasy negizinde salynǵan.
Aıta keteıik, jyl sońyna deıin sol jaǵalaýdan alǵashqy shaǵyn aýdan men birqatar áleýmettik nysandardy paıdalanýǵa berý josparlanyp otyr.
Jumys sapary barysynda Máýlen Áshimbaev №3 S.Tolybekov atyndaǵy mektep-lıtseıiniń jáne Á.Tájibaev atyndaǵy oblystyq ǵylymı ámbebap kitaphanasynda ornalasqan ІT-park jumysymen tanysty.
Ári qaraı «Kásipkerlikke arnalǵan geoaqparattyq onlaın qyzmeti» partııalyq jobasy sheńberindegi kásipkerlerge qyzmet kórsetý ortalyǵyna bardy. Ortalyqta kásipkerlerge «bir tereze» qaǵıdaty boıynsha jer máseleleri, sáýlet jáne qurylys, ınjenerlik jelilerge qosylý, memlekettik kiris máseleleri, qarjy ınstıtýttary úshin qarjylandyrý sharttary, bankke deıingi jáne keıingi jobalardy qoldaý boıynsha 40-tan astam qyzmet túri usynylady. Barlyq qyzmetter tegin kórsetiledi. Bul respýblıka kóleminde teńdesi joq ortalyq bolyp tabylady.
Baǵdarlama aıasynda M.Áshimbaev Syrdarııa aýdanynyń Shaǵan aýylynda ótkizilgen aktıv jıynyna qatysty.
