Máýlen Áshimbaev Jetisaıdaǵy oqıǵa jaıynda: Іsti qoǵamdyq baqylaýda ustaımyz

NUR-SULTAN. QazAqparat - «Nur Otan» partııasy janyndaǵy Balalar quqyǵyn qorǵaý jónindegi respýblıkalyq keńes Túrkistanda balalardyń ógeı anadan zorlyq-zombylyq kórý oqıǵasynyń mán-jaıyn anyqtaýǵa kiristi. Bul jaıynda «Nur Otan» partııasy Tóraǵasynyń birinshi orynbasary Máýlen Áshimbaev Fesbýktegi paraqshasynda jazdy, dep habarlaıdy QazAqparat tilshisi.

«Túrkistan oblysyndaǵy sumdyq oqıǵany estigende qınalmaǵan adam bolmaǵan shyǵar. Beıkúná sábılerdiń munshalyqty qorlyq kórýi aıtýǵa aýyz barmaıtyn adamshylyqqa jat kórinister. Sondyqtan «Nur Otan» partııasy bul oqıǵany dereý nazarǵa alyp, qajetti sharalardy bastady», - dedi M.Áshimbaev.

Onyń atap ótýinshe, partııa janynan qurylǵan Balalar quqyǵyn qorǵaý jónindegi respýblıkalyq keńes shuǵyl iske kirisip, mán-jaıdy anyqtaý jumystaryn bastap ketti. Keńes tóraǵasynyń orynbasary Dınara Zakıevaǵa jáne partııanyń oblystyq fılıalyna tıisti tapsyrmalar berildi.

«Qajet bolsa partııa tergeý jumystaryna da kómektesýge daıyn. Biz kináliniń zań aıasynda jazaǵa tartylýy úshin barlyq sharalardy qolǵa alamyz. Jalpy mundaı ozbyrlyqpen búkil qoǵam bolyp kúresýimiz kerek. Sondyqtan ár azamat osyndaı oqıǵalarǵa beı-jaı qaramaı óz únin qossa deımin. Bala quqyǵyn taptap, eldiń bolashaǵyn tunshyqtyrýǵa eshkimniń quqyǵy joq. Ár bala baqytty bolýǵa laıyq. Sondyqtan partııa bul isti aıaqsyz qaldyrmaı, sońyna deıin qatań qoǵamdyq baqylaýda ustaıdy», - dep atap ótedi ol.

Buǵan deıin Jetisaı aýdanynda ógeı sheshe qyzdaryna qorlyq kórsetken beınejazba taraǵanyn habarlaǵan edik.

Osydan keıin Túrkistan oblystyq Polıtsııa departamenti atalǵan oqıǵaǵa qatysty tergeý sharalary bastalǵanyn málimdedi.

Іshki ister mınıstri Erlan Turǵymbaev ta bul máseleni óz baqylaýyna alǵany belgili boldy.