Máýlen Áshimbaev jedel járdem qyzmetkerlerin 8 naýryz merekesimen quttyqtady
Qalalyq jedel járdem stansasy elordamyzdaǵy eń kóne medıtsınalyq mekemelerdiń biri. Onyń negizi 1932 jyly 14 aqpanda qalanǵan. Al 2017 jyly Prezıdenttik baǵdarlama aıasynda stansa jańa ǵımaratqa kóshirildi. Mundaǵy qyzmetkerlerdiń barlyǵy joǵary bilikti mamandar. Osydan eki jyl buryn, ıaǵnı 2016 jyly Lıtvada ótken Halyqaralyq medıtsınalyq jedel járdem saıysynda atalǵan stansanyń brıgadasy 3-oryn aldy. Al ótken jyly EHRO-2017 halyqaralyq kórmesi aıasynda ótkizilgen ІІ Respýblıkalyq jedel járdem qyzmetkerleriniń saıysynda 2-orynnan kórindi.
Stansanyń bas dárigeri Saparbek Dúısenovtiń aıtýynsha, mekeme barlyq zamanaýı qondyrǵylarmen tolyq jabdyqtalǵan. Sonyń nátıjesinde táýligine 274 shaqyrýǵa deıin qyzmet kórsetýge qaýqarly. Shaqyrýlardyń ózi 4-6 sanatqa bólinedi. Myńǵa jýyq qyzmetker eńbek etetin ujymda qyz-kelinshekterdiń de sany aıtarlyqtaı kóp. Degenmen, olardyń bári birdeı mereke kúnderi erkin demalýǵa mursat almaıdy. Óıtkeni halyq densaýlyǵyna adal qyzmet etetin abzal jandar bul kúnderi de jumysqa shyǵyp, óz mindetterin oryndaıdy. «Nur Otan» partııasy Tóraǵasynyń Birinshi orynbasary osyndaı jumys ústindegi arýlardy arnaıy quttyqtap, olarǵa sáttilik tiledi.
«Bul mereke meıirim men izgiliktiń, jaqsylyq pen jylylyqtyń belgisi. Onyń sánin de, árin keltiretin aq jaýlyqty ájelerimiz ben aıaýly arýlarymyz. Sondyqtan sizderdi búgingi tól merekelerińizben shyn júrekten quttyqtaımyn. Meıramǵa qaramastan jumysqa shyǵyp, halyqqa qyzmet kórsetý sizderdiń jaýapkershilikterińizdi kórsetedi. Árdaıym eńbekte bıik belesterdi baǵyndyryp, jetistikterge jete berińizder», - dedi Máýlen Áshimbaev.
Sonymen qatar partııa Tóraǵasynyń Birinshi orynbasary Eńbek jáne halyqty áleýmettik qorǵaý mınıstri Mádına Ábilqasymovamen birge «Sharapat» áleýmettik qyzmet kórsetý ortalyǵyna baryp, áıelder qaýymyn merekemen quttyqtady. Bul ortalyqta jalǵyzbasty jáne kómekke muqtaj zeınet jasyndaǵy qarııalar men múmkindigi shekteýli jandarǵa kútim jasalyp, keshendi áleýmettik qyzmet kórsetiledi. «Búginde 295 qarııaǵa qyzmet kórsetemiz. Olardyń arasynda 3 Uly Otan soǵysynyń ardageri, 14 solarǵa teńestirilgender jáne 33 tyl ardageri bar. Ortalyq 1989 jyldan beri jumys istep keledi. Al 2007 jyly «Kóktal-1» turǵyn alabynda ortalyqtyń jańa ǵımaraty salynyp, osynda kóship keldik», - deıdi Ortalyq basshysy Kenjebolat Bapyshev.
Mekeme zamanaýı medıtsınalyq qondyrǵylarmen jabdyqtalǵan. Munda pallıatıvti kómek bólimi men shuǵyl jaǵdaıdaǵy arnaıy palata da jumys isteıdi. Barlyq kabınetterde ıntensıvti kútim men terapııaǵa arnalǵan qajetti medıtsınalyq qurylǵylar ornatylǵan.
Máýlen Áshimbaev «Sharapat» áleýmettik qyzmet kórsetý ortalyǵynyń qyzmetkerleri jáne ondaǵy qamkóńil jandarmen kezdesýinde barlyq áleýmettik máseleler árdaıym «Nur Otan» partııasynyń basym baǵyty bolyp qalatynyn aıtty. Ortalyqtaǵy aq jaýlyqty ájeler men aıaýly arýlardy merekemen quttyqtaǵan partııa Tóraǵasynyń Birinshi orynbasary «Prezıdenttiń bes áleýmettik bastamasy» Qazaqstannyń áleýmettik jańǵyrýyndaǵy jańa kezeńdi bastaǵanyna nazar aýdardy. Sondaı-aq, ol bul bastamalar kóp keshikpeı óz nátıjesin beretinin de atap ótti.
«Áleýmettik sala Elbasynyń erekshe nazarynda. Jaqynda jarııalanǵan úndeýinde Memleket basshysy áleýmettik jańǵyrýdyń negizgi bes bastamasyn aıqyndap berdi. «Nur Otan» partııasy atalǵan basym-baǵyttardyń júzege asyrylýyna tikeleı jaýapty. Sondyqtan búgin osy salada qyzmet kórsetetin mekemelerge arnaıy baryp, merekemen quttyqtaýdy uıǵardyq. Jalpy anaǵa qurmet kórsetý barshamyzdyń abyroıly mindetimiz. Búgingi merekeniń basty máni de osy uǵymmen úndesedi dep bilemin. Osy rette Ortalyqtaǵy barsha apa-ájelerimiz ben arýlarymyzdy 8 naýryz meıramymen shyn júrekten quttyqtaımyn», - degen Máýlen Áshimbaev olarǵa myqty densaýlyq pen uzaq ǵumyr tiledi.
