Máýlen Áshimbaev: Ulttyq quryltaıda elimizdiń aldaǵy jańa ıdeologııalyq tujyrymy aıqyndaldy

ASTANA. QazAqparat – Ulttyq quryltaıda elimizdiń aldaǵy jańa ıdeologııalyq tujyrymy aıqyndaldy. Senat Tóraǵasy Máýlen Áshimbaev keshe Túrkistanda ótken alqaly jıynǵa qatysty osyndaı pikir bildirdi, dep habarlaıdy QazAqparat.

Bul joly qozǵalǵan máseleniń mazmuny aýqymdy, mańyzy erekshe boldy. «Ádiletti Qazaqstan – Adal azamat» taqyrybyna arnalǵan jıynda Memleket basshysy Qasym-Jomart Kemeluly Toqaev ulttyq biregeıligimizdi nyǵaıtý jáne elimizde jańa qundylyqtardy ornyqtyrý jónindegi oılary men usynystaryn ortaǵa saldy. Shyn máninde, tutas dúnıe almaǵaıyp kezeńdi bastan ótkerip jatqan qazirgi tańda eldiń irgesin bekemdeý, ulttyń jańa sapasyn qalyptastyrý jáne qoǵamda adamgershilik, bilimpazdyq, eńbekqorlyq sııaqty qasıetterdi keńinen dáripteý aıryqsha mańyzǵa ıe. Osy oraıda Prezıdentimiz memlekettik nyshandardy jetildirý, ultymyzdyń tarıhı sana-sezimin jańǵyrtý, mádenı muramyzdy jan-jaqty dáripteý sekildi baǵyttarǵa erekshe toqtaldy. Soǵan sáıkes tól tarıhymyzdyń kóptomdyq jınaǵyn kelesi jyly aıaqtaýdy tapsyrdy. Tarıhı tulǵalarymyzdyń biryńǵaı tizimin jasaý jáne qoldanystaǵy keıbir ordenderdi Beıbarys sultan sııaqty halqymyzdyń birtýar perzentteriniń esimderimen ataý máselesin de kóterdi

, - dep jazdy M.Áshimbaev Facebook-paraqshasynda.

Senat tóraǵasy quryltaıda Memleket basshysy óskeleń urpaqtyń tárbıesine de basa nazar aýdarǵanyn atap ótti.

Búgingi býyn ultymyzdyń erteńgi kelbeti, bolashaq bolmysy ekeni anyq. Sondyqtan jas urpaqtyń patrıot, bilimdi, deni saý tulǵa bolyp qalyptasýy asa mańyzdy. Osy jolda ata-ana, mektep jáne búkil qoǵam bolyp jumylýymyz qajet. Sonymen qatar Qasym-Jomart Kemeluly aqparat saıasatynyń tıimdiligin arttyrý, kreatıvti ındýstrııany damytý, memlekettik saıasatta taldaý, saraptama jasaý qyzmetin sapaly júrgizý jáne memlekettik basqarý júıesin odan ári jańǵyrtýǵa qatysty basymdyqtardy da atap ótti. Prezıdentimiz kitap basyp shyǵarý isi ıdeologııa jumysyndaǵy negizgi baǵyttyń biri ekenin aıtyp, «Balalar kitaphanasy» atty jańa baǵdarlamany qolǵa alýdy tapsyrdy. Sondaı-aq táýlik boıy jumys isteıtin Prezıdent kitaphanasyn ashý týraly oıymen bólisti. Shekara mańyndaǵy aýyldardyń ahýaly eldiń amandyǵyna tikeleı yqpal etetini belgili. Atalǵan aımaqtardyń áleýetin arttyrýdyń strategııalyq máni zor. Sondyqtan Memleket basshysynyń Qaton-Qaraǵaı, Marqakól, Maqanshy aýdandaryn qalpyna keltirý týraly sheshimi ulttyń tutastyǵyn odan ári nyǵaıtý turǵysynan jasalǵan utymdy qadam ekeni sózsiz. Jalpy, búgingi otyrysta elimizdiń aldaǵy jańa ıdeologııalyq tujyrymy aıqyndaldy deýge tolyq negiz bar. Prezıdentimiz osy baǵdardy ornyqtyrý úshin memlekettik apparat, sarapshylar, ǵalymdar, tilshiler, azamattyq qoǵam ókilderi bir kisideı atsalysýy qajet ekenin tilge tıek etti. Eldik múddeni kózdeıtin bul isten Parlament Senaty da qalys qalmaıdy. Aldaǵy ýaqytta Quryltaıda aıtylǵan oılar men usynystar ár qazaqstandyqtyń adal azamat bolyp qalyptasýyna, memlekettiligimizdi nyǵaıtýǵa jáne Táýelsizdigimizdiń tuǵyryn bıiktetýge óz úlesin qosady dep senemiz

, - dedi palata basshysy.