Máýlen Áshimbaev Ulttyq qordan alynǵan aqshanyń tıimdi jumsalmaıtynyn synady
«Másele Ulttyq qor qarajatyn paıdalanbaýda emes, paıdalaný kerek, mundaı jaǵdaıda bolmasa, endi qashan qoldanamyz? Qazirgi jaǵdaı ońaıǵa soǵyp turǵan joq. Mundaǵy másele - Ulttyq qor qarjysyn utymdy ári tıimdi paıdalaný qajet, olardan qaıtarym bolýy kerek», - dedi Máýlen Áshimbaev Senattyń jalpy otyrysynda.
Mysal retinde Senat spıkeri ótken jyly Ulttyq qor nysanaly transfertinen alynǵan qarajat qaıda jumsalǵanyn aıtty.
«Buqaralyq jáne ulttyq sport túrlerin damytýǵa 1,7 mlrd teńge bólinipti. Bul somanyń jartysyna jýyǵy paıdalanylmaı qaldy. Oǵan qosa, ulttyq fılmderdi qoldaýǵa jáne ilgeriletýge 3,3 mlrd teńge bólindi. Onyń tek 34%-y ǵana jumsalǵan. Nege qarajat bólindi? Bólingen eken, nege qoldanylmady?», - dedi M. Áshimbaev.
Senat tóraǵasy qazirgi shyǵyndardy Ulttyq qordan emes, respýblıkalyq bıýdjetten qarjylandyrý kerek dep esepteıdi.
«Jalpy Ulttyq qordan qarajat bólý qanshalyqty durys? Ulttyq qor transfertterine tıispeı, qazirgi shyǵystardy ózge de túsimder esebinen, respýblıkalyq bıýdjet kiristerinen qarjylandyrýǵa bolatyn shyǵar. Osyǵan baılanysty Úkimet pen depýtattarǵa qor qarajatyn paıdalaný tártibi kerek sııaqty. Qajet bolsa, erejelerdi kúsheıtip, qatańdatýǵa bolady. Bul baǵytta Úkimettiń belsendi jumysyna úmit artamyz jáne Ulttyq qor máselesi esep kúıinde qabyldanatyn bolady», - dedi M. Áshimbaev.
Aıta keteıik, búgin Senat otyrysynda depýtattar «Qazaqstan Respýblıkasynyń Ulttyq qorynan 2022–2024 jyldarǵa arnalǵan kepildendirilgen transfert týraly» QR Zańyna ózgeris engizý týraly» jáne «2022–2024 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zańdardy qarap, maquldady.
Bul túzetýler aıasynda sáýir aıynan bastap zeınetaqy men áleýmettik tólemder qosymsha 4 paıyzǵa artady. Jalpy zeınetaqynyń ortasha mólsheri ótken jylmen salystyrǵanda 11 paıyzǵa ósedi.
