Máýlen Áshimbaev Úkimetke salyq jeńildikterin jan-jaqty zerdeleýdi usyndy

NUR-SULTAN. QazAqparat – Elimizde iri kásiporyndarǵa beriletin salyqtyq jeńildikterdi jan-jaqty zerdeleý qajet. Bul týraly Senat tóraǵasy Máýlen Áshimbaev aıtty, dep habarlaıdy QazAqparat tilshisi.

«Úkimet úlken jumys jasap jatyr. Bul jumystardyń barlyǵyn depýtattar qoldaıdy. Sondaı-aq osy jumystardyń aıasynda aldaǵy ýaqytta salyqtyq jeńildikterdi de bir saraptap qoıǵan artyq bolmaıtyn shyǵar dep esepteımiz. Jalpy, bizdiń qolymyzdaǵy aqparatqa sáıkes, 2020 jyly salyqtyq jeńildikterge baılanysty bıýdjet túsimi 4,8 trln teńgeden astam somaǵa kem boldy. Ol úlken soma. Negizgi salyqtyq jeńildikter shaǵyn kásiporyndarǵa emes, úlken kásiporyndarǵa berilip jatqany belgili», - dedi ol Senattyń jalpy otyrysynda.

Senat spıkeriniń dereginshe, osy jeńildikterdiń 40 paıyzy qarjy jáne taý-ken óndirý salasyndaǵy kásiporyndarǵa tıesili bolyp otyr.

«Bul rette salyqtyq jeńildikterden bas tartaıyq degen áńgime joq. Ol halyqaralyq tájirıbe. Ony qoldanýymyz kerek, osy baǵytta jumys isteýimiz kerek. Degenmen osy jeńildikter memleketimizge ne berip jatyr? Ekonomıkamyzǵa qandaı áserin tıgizedi? Sony da bir saraptap qoıǵan artyq bolmas. Osy jyldyń basynda Prezıdentimiz Salyq kodeksine túgendeý jasaý kerektigin kótergen bolatyn. Osy jumystyń aıasynda salyqtyq jeńildikterdi de jan-jaqty zerdeleısizder dep senemiz. Sol jumystyń qorytyndysy boıynsha Parlamentke aqparat beresizder dep úmittenemiz»,- dedi Máýlen Áshimbaev.