Máýlen Áshimbaev: Úkimet Ulttyq qordy paıdalanýdy azaıtý sharalaryn qarastyrýy qajet
«Úkimet, Ulttyq bank jáne Esep komıtetiniń esepterin zerdeleı kelip, 2019 jylǵy respýblıkalyq bıýdjettiń negizgi parametrleri oryndaldy degen qorytyndy jasaýǵa bolady. Búgingi kúni respýblıkalyq bıýdjet elimizdegi ekonomıkalyq belsendilikti qoldaýdyń negizgi tetigi bolyp otyr. Jalpy Úkimet memlekettik baǵdarlamalardyń oryndalýyn aıtarlyqtaı deńgeıde qamtamasyz etti. Sonyń arqasynda kózdelgen maqsattardyń negizgi kórsetkishterine qol jetkizildi. Esep komıtetiniń de belsendi jumysyn atap ótkim keledi», - dedi Máýlen Áshimbaev Parlament Senatynyń otyrysynda.
Senat spıkeri óz sózinde atqarylǵan jumystarǵa qaramastan olqylyqtar da joq emestigin atap ótti.
«Mysaly tıimsiz jumsalǵan bıýdjet qarajatynyń kólemi úsh ese artqan. Esep komıteti ótken jyldary ózge de zańbuzýshylyqtarǵa jol berilgenin anyqtap otyr. Igerilmegen qarjy kólemi de aıtarlyqtaı ósken. Sondaı-aq búgin de Ulttyq qordy úılesimdi basqarý, ásirese onyń saqtalýyn jáne tabystylyǵyn tıisti deńgeıge jetkizý máselesi ózekti bolyp otyr. Ulttyq qor qarajatyn paıdalaný jaǵdaılary artyp, bıýdjet kirisiniń shamamen úshten biri osy qordan jasaqtalǵany málim. Bul jaǵdaıǵa depýtattar alańdaýshylyqpen qarap otyr. Ulttyq qordy paıdalanýdy azaıtý úshin Úkimet bıýdjet kirisine basa mán bere otyryp, shyǵyndardyń tıimdiligin qamtamasyz etýi qajet», - dedi ol.
Máýlen Áshimbaev óz sózinde bul rette óńirlerge basa mán bergen jón ekenin jetkizdi.
«Depýtattardyń paıymdaýynsha qoldanystaǵy bıýdjet júıesi artyǵymen ortalyqtandyrylǵan. Áli kúnge deıin respýblıkalyq bıýdjetten bólinetin qarajat óńirlerdegi áleýmettik-ekonomıkalyq máselelerdi sheshýdiń basty qarjy kózi bolyp otyr. Mundaı bıýdjetaralyq qatynas jergilikti bıliktiń óńir ekonomıkasyn damytýǵa jáne kiris bazasyn keńeıtýge degen motıvatsııasyn tómendetedi dep oılaımyz. Sondaı-aq óńirlerdegi damýǵa bólinetin qarajat ta keıbir jaǵdaıda tıimsiz jumsalýda. Sondyqtan barlyq deńgeıdegi bıýdjet protsesin uıymdastyrý jumysyn jetildirgen abzal. Osyǵan oraı aımaqtar deńgeıinde ashyq bıýdjetti engizý máselesin qolǵa alǵan durys bolady. Sol arqyly azamattar qarjynyń qaıda jumsalyp jatqanyn kórip, óz usynystaryn berip, qarajattyń jumsalýynyń tıimdiligin baǵalaýǵa múmkindik alady. Mundaı tájirıbeni barlyq bıýdjettik mekemege engizgen jón», - dedi Máýlen Áshimbaev.
