Máýlen Áshimbaev shetel bankterine qaryz qazaqstandyqtar statıstıkasyn júrgizýdi usyndy

ASTANA. QazAqparat - EAEO-nyń basqa elderinde kredıt alyp, tóleı almaı qalǵan qazaqstandyqtar ne isteýi kerek? El ishindegi osyndaı problemalardy sheshý úshin jaqynda bankrottyq týraly zań qabyldandy. Al shetelde alynǵan nesıege qatysty jaǵdaıda qandaı áreket jasaımyz? Búgin Máýlen Áshimbaev Senatta Eýrazııa ekonomıkalyq odaǵy (EAEO) aıasynda kredıttik tarıh boıynsha málimetter almasý týraly zańdy qaraý kezinde osyndaı máselelerdi kóterdi, dep habarlaıdy QazAqparat tilshisi.

«Bul másele qaryzyn tóleı almaı qalatyn boryshkerlerdiń kóbeıýine ákelmeı me? Bizdiń tutynýshylyq nesıe talaptaryn qatańdatýǵa arnalǵan zańnamamyz ben EAEO elderindegi tıisti normalar birdeı emes. Ol jerde mundaı jaǵdaı barynsha lıberaldy bolýy múmkin. Jalpy, biz qansha azamatymyz nemese qazaqstandyq uıym shetelden nesıe alǵany jóninde statıstıka júrgizýimiz kerek. Sol arqyly qansha azamatymyzdyń sheteldik nesıe mekemelerine qaryzy bar ekenin bilemiz. Qolymyzda osyndaı statıstıka bolýy kerek. Ol málimetterdi qajet jaǵdaıda jumysymyzda qoldana alamyz», – dedi M. Áshimbaev.

Sonymen qatar Senat tóraǵasy Qazaqstanda azamattarǵa boryshtyq júktemeni tómendetý boıynsha júıeli jumys júrgizilip jatqanyn atap ótti. Bul Senattyń zańnamalyq deńgeıdegi qyzmetindegi basym baǵyttardyń biri ekeni de sóz boldy.

«Ekonomıkaǵa kredıt bólýdi keńeıtý jáne halyqtyń tutynýshylyq baǵyttaǵy nesıesin azaıtý – strategııalyq mindet. Tutynýshylyq nesıe keıingi jyldary 2 esege artyp, 14 trln teńgeden asqan. Osyndaı jaǵdaıdyń saldarynan elimizde nesıelerin óteı almaı qalǵandardyń arta túskeni baıqaldy. Sondyqtan Prezıdentimizdiń bastamasymen «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyq týraly» zań qabyldandy. Sol arqyly azamattarymyzdyń boryshtyq júktemesin azaıtý kózdelip otyr», – dedi Máýlen Áshimbaev.

Budan buryn habarlanǵandaı, búgin Senattyń jalpy otyrysynda «Eýrazııalyq ekonomıkalyq odaq sheńberinde kredıt tarıhynyń quramyna kiretin málimetterdi almasý tártibi týraly kelisimdi ratıfıkatsııalaý týraly» Zańy maquldandy.