Máýlen Áshimbaev senatorlardyń aldaǵy ýaqyttaǵy negizgi jumystaryn atady
«Prezıdent bıylǵy Joldaýynda jańa jaǵdaıdaǵy barlyq is-qımylymyzdy naqty belgilip berdi. Bul basymdyqtardy iske asyrý úshin Parlamentke úlken mindet júktelip otyr. Sebebi, biz Memleket basshysynyń ár bastamasyn sapaly zańdarmen qamtamasyz etýimiz kerek. Qasym-Jomart Kemeluly Joldaýda aldaǵy ýaqytta naqty qandaı zańdar qabyldanýy tıis ekenin de kórsetip berdi. Soǵan sáıkes, memlekettik qyzmet týraly zańnamaǵa tıisti túzetýler engiziletin boldy. Bul memlekettik basqarýdyń jańa úlgisin qalyptastyrý úshin asa mańyzdy. Qazirgi kezde osy baǵytqa tyń serpin kerek ekenin bárimiz kórip otyrmyz», - dedi M. Áshimbaev Senattyń jalpy otyrysynda.
Osy oraıda ol senatorlardy bul jumysqa belsene atsalysýǵa shaqyrdy.
«Sondaı-aq, Memleket basshysy jańa ulttyq ındýstrıany damytýǵa arnalǵan jańǵyrtylǵan zańnamalyq negiz daıyndaýdy jáne jyl sońyna deıin ónerkásip saıasaty týraly zańdy ázirleýdi tapsyrdy. Munyń bári turaqty ekonomıkalyq ósimdi qamtamasmyz etýge baǵyttalǵan bastamalar ekeni anyq. Kvazımemlekettik sektordyń barlyq satyp alý jumystaryn retteıtin birtutas zańdy da jyl sońyna deıin qabyldaý mindeti qoıylyp otyr. Shyn máninde bul salada másele az emes. Sonyń bárin zańmen rettep, satyp alýlardyń ashyq, ádil júrgizilýin qamtamasyz etken jón. Osy jumysqa Senat depýtattary ózderiniń úlesin qosady senemin», - dedi M. Áshimbaev.
Senat tóraǵasy Joldaýda Salyq kodeksin jetildirýge, sybaılas jemqorlyqpen kúresti kúsheıtýge jáne aqparatqa qol jetkizýdi qamtamasyz etýge basa mán berilgenin eske saldy.
«Sonymen qatar, qorshaǵan ortany qorǵaýdyń zamanaýı júıesin qalyptastyratyn Ekologııalyq kodeksti qabyldaý máselesi de nazardan tys qalmady. Prezıdentimiz azamattardyń, ásirese, balalardyń quqyǵyn qorǵaýǵa qatysty zańnamalyq sharalar qabylaý kerektigin aıtty. Ózderińizge belgili, qazir qoǵamnyń belsendiligi aıtarlyqtaı artyp keledi. Azamattarymyz kópshilikti alańdatqan máseleler boıynsha pikirin ashyq bildirip, olardy sheshý joldaryn da usynyp júr», - dedi ol.
Senat Tóraǵasy bul úrdisti memleket múddesi úshin tıimdi paıdalaný qajet ekenin jáne osyny eskerip, Prezıdent jergilikti ózin-ózi basqarýdy damytý, qoǵamdyq baqylaýdy kúsheıtý, qoǵamdyq keńesterdiń rólin arttyrý baǵyttarynda quqyqtyq negiz qalyptastyrýdyń mańyzdylyǵyna toqtalǵanyn aıtty.
«Aldymyzda aýqymdy jumystar tur. Sonyń bárin der kezinde jáne júıeli túrde júzege asyrý úshin aıanbaı eńbek eteıik, árbir zań jobasyn ulttyq múdde, óńirlerdi damytý turǵysynan qarap, talqylaıyq. Bul - senatorlardyń mindeti. Zań jobalaryn qaraǵan kezde azamattyq qoǵam ókilderimen, memlekettik emes uıymdarmen, mamandarmen tyǵyz jumys isteý qajet. Qoǵamnyń suranystaryn eskerip, ózekti problemalardy talqylap, olardyń sheshilýine úlesimizdi qosý – negizgi basymdyqtarymyzdyń biri. Bizdiń osy sessııadaǵy árbir sharamyz ashyq, ózekti, tıimdi bolyp, naqty nátıjelerdi qamtamasyz etýge tıis. Aldaǵy ýaqytta senatorlar osy baǵyttarda belsendilik tanytyp, bárimiz birlesip, jumysty óte nátıjeli túrde uıymdastyramyz dep senemin», - dedi Máýlen Áshimbaev.