Máýlen Áshimbaev Senat jumysynyń negizgi basymdyqtaryn aıtty

ASTANA. QazAqparat – Búgin Senattyń jalpy otyrysynda palata tóraǵasy Máýlen Áshimbaev Memleket basshysy belgilep bergen mindetterdi oryndaý aıasynda jańarǵan Parlament jumysynyń negizgi basymdyqtaryna nazar aýdardy, dep habarlaıdy QazAqparat tilshisi.

«Búgin biz segizinshi saılanǵan Parlamenttiń birinshi sessııasyndaǵy alǵashqy Senat otyrysyn ókizip otyrmyz. Sessııanyń ashylýyna Prezıdent Qasym-Jomart Toqaev qatysyp, birqatar ózekti ári mańyzdy máseleni kóterdi. Osy oraıda Parlament pen Úkimetke naqty mindetter júkteldi. Soǵan sáıkes keshe palata bıýrosynyń otyrysynda jańa sessııaǵa arnalǵan jumys josparyn bekittik», - dedi M. Áshimbaev.

Sonymen qatar Senat tóraǵasy zań shyǵarý qyzmetinde jańa tásilderdi qoldanýdyń jáne múddeli organdarmen, sarapshylarmen, óńirlerdegi belsendi azamattarmen tyǵyz baılanys ornatý mańyzdy ekenin atap ótti.

Palata spıkeriniń aıtýynsha, mundaı jumys formaty ázirlenip jatqan qujattardy jan-jaqty taldaýǵa jáne olardyń sapasyn arttyrýǵa yqpal etedi.

«Zańdardy qaraý kezinde talqylaý protsesterin barynsha ashyq, ınklıýzıvti, jarııa túrde ótkizýimiz kerek. Mundaı qadam Parlamenttiń ashyqtyǵyn arttyrýǵa septigin tıgizedi. Senat jumysynda óńirlerdiń jáne shalǵaı aýyldardyń turǵyndaryn alańdatqan máseleler, sondaı-aq senatorlarmen kezdesýler kezinde kóterilgen problemalar eskerilýi tıis. Bul – bizdiń negizgi mindetimiz», – dedi Máýlen Áshimbaev.

Budan buryn habarlanǵandaı, bıyl 29 naýryzda VIII saılanǵan Qazaqstan Respýblıkasy Parlamentiniń birinshi sessııasy ashyldy. Jıynǵa Memleket basshysy Qasym-Jomart Toqaev qatysty.