Máýlen Áshimbaev: Senat Prezıdent bastamalaryn iske asyrýdy zańnamalyq turǵydan qamtamasyz etýge daıyn
NUR-SULTAN. QazAqparat – Aldaǵy ýaqytta saılaý bıýlletenderine «bárine qarsymyn» degen jazý engiziletin boldy. Bul týraly QR Parlamenti Senatynyń tóraǵasy Máýlen Áshimbaev Facebook-tegi paraqshasynda habarlady.
«Búgin VII shaqyrylymdaǵy Parlamenttiń 1-sessııasy óz jumysyn bastady. Sessııanyń ashylýynda Memleket basshysy jańartylǵan depýtattyq quramnyń aldynda turǵan mańyzdy mindetterdi belgilep berdi. Sondaı-aq, elimizde qolǵa alynǵan áleýmettik-ekonomıkalyq jáne saıası reformalardyń ári qaraı jalǵasa beretinin naqty atap ótti.
Parlament Palatalarynyń birlesken otyrysynda Prezıdentimiz saıası reformalardyń kezekti toptamasyn jarııalady. Soǵan sáıkes saıası partııalardyń Májiliske ótý shegi 7-den 5 paıyzǵa deıin tómendetiledi. Bul kóppartııalyqty damytý jolyndaǵy mańyzdy qadam ekeni sózsiz. Odan bólek, saılaý bıýlletenderine «bárine qarsymyn» degen jazý engiziletin boldy jáne ákimderdi saılaý aıasyn keńeıtý úshin tıisti sharalar qabyldanady» dep jazdy Senat Tóraǵasy.
Sondaı-aq ol «Halyq únine qulaq asatyn memleket» tujyrymdamasyn iske asyrý maqsatymen onlaın-petıtsııa ınstıtýty zań júzinde resimdeletinin aıtty. Mundaı shara azamattyq qoǵamnyń belsendiligin arttyratyny anyq.
«Sonymen qatar Memleket basshysy Ombýdsmen týraly arnaýly zań qabyldaý qajettigin aıtty. Sot júıesin reformalaý jumystary da jalǵasa beredi. Munyń bári adam quqyǵyn qorǵaý máselesin jańa deńgeıge kóteretin naqty sharalar ekeni sózsiz.
Qasym-Jomart Kemeluly áleýmettik máselelerge de aıryqsha nazar aýdardy. Áleýmettik qamtamasyz etý baǵytyndaǵy memlekettik saıasat keshendi túrde jańǵyrtylady. Kómekke muqtaj azamattarǵa ataýly áleýmettik qoldaý kórsetý isi odan ári jandana túspek. Sondyqtan Parlament osy oraıdaǵy zańnamalardy jetildirip, tyń bastamalardy tabysty iske asyrýǵa quqyqtyq qoldaý kórsetedi» dep jazdy ol.
Odan bólek, Máýlen Áshimbaev Prezıdenttiń densaýlyq saqtaý salasyn damytý bastamalaryna pikir bildirdi.
«Memleket basshysy densaýlyq saqtaý salasyn odan ári damytý qajet ekenin de atap ótti. Bul rette emdelýshilerdiń múddesi jáne olardyń densaýlyǵy basty nazarda bolýǵa tıis. Sol sebepti aldaǵy ýaqytta bul baǵytta aýqymdy jumys qolǵa alynady. Jastardy qoldaý, bilim berý isin jetildirý, maman daıarlaý jáne basqa da salalar boıynsha tıisti jobalar ázirlenip, júzege asyrylady.
Jalpy, búgin jarııalanǵan bastamalar Prezıdentimizdiń buǵan deıin qolǵa alǵan barlyq saladaǵy júıeli jańǵyrtýlarynyń laıyqty jalǵasy ekeni anyq. Bul sharalar saıası júıemizdi odan ári damytýǵa, sheshim qabyldaý úderisine azamattardyń kóptep qatysýyna jaǵdaı jasaýǵa jáne qazaqstandyqtardyń ómir súrý sapasyn arttyrýǵa arnalǵan» dep jazdy Máýlen Áshimbaev.
Sóz sońynda joǵary palata basshysy Senat atalǵan bastamalardy nátıjeli iske asyrý jumystaryn zańnamalyq turǵydan qamtamasyz etýge daıyn ekenin atap ótti.
«Senatorlar egemen elimizdiń ósip-órkendeýine qajetti zańdardy daıyndaý, talqylaý jáne qabyldaý barysynda jańadan saılanǵan Májilis depýtattarymen birlesip jumys isteıtin bolady», - dedi ol.
