Máýlen Áshimbaev Reseı Elshisimen óńiraralyq jáne shekaramańy yntymaqtastyǵyn talqylady

NUR-SULTAN. QazAqparat - Parlament Senatynyń Tóraǵasy Máýlen Áshimbaev Reseıdiń Qazaqstandaǵy Tótenshe jáne Ókiletti Elshisi Alekseı Borodavkınmen eki el arasyndaǵy yntymaqtastyqty odan ári nyǵaıtý máselesin talqylady, dep habarlaıdy QazAqparat.

Senat Tóraǵasy parlamentaralyq dıalog Qazaqstan-Reseı yntymaqtastyǵynyń mańyzdy quramdas bóligi bolyp tabylatynyn atap ótti.

«Ekijaqty qarym-qatynastarda óńiraralyq jáne shekaramańy yntymaqtastyǵynyń mańyzy zor. Qazirgi tańda Qazaqstan men Reseı arasyndaǵy taýar aınalymynyń shamamen 70 paıyzy óńiraralyq jáne shekaramańy saýdasyna tıesili. Bizdiń memleketterimizdiń basshylary shekara mańyndaǵy yntymaqtastyqqa erekshe nazar aýdaryp otyr. Qazaqstan men Reseıdiń Óńiraralyq yntymaqtastyq forýmdary ótkizilip keledi. Senatorlarymyzdyń basym bóligi belgili bir aımaqtardan saılanǵan. Sondyqtan senatorlar bizdiń elderimiz Prezıdentteriniń barlyq bastamalaryn qoldaıdy ári júzege asyrýǵa belsene qatysyp keledi», – dedi Máýlen Áshimbaev.

Senat Tóraǵasynyń aıtýynsha, qos el arasyndaǵy qarym-qatynas ǵylymı-bilim berý, mádenı-gýmanıtarlyq jáne basqa da salalarda tabysty damyp keledi.