Máýlen Áshimbaev referendýmnan keıin Senattyń aldyndaǵy basty mindetterdi atady
«5 maýsym kúni elimizde jalpyulttyq referendým ótti. Bul el tarıhyndaǵy eń mańyzdy ári sheshýshi oqıǵalardyń biri bolǵany sózsiz. Referendýmǵa qatysqan azamattarymyzdyń basym bóligi Konstıtýtsııaǵa usynylǵan túzetýlerdi qoldap, daýys berdi. Osylaısha, Qazaqstan halqy Prezıdent Qasym-Jomart Kemeluly Toqaevtyń «Jańa Qazaqstan» qurý jolyndaǵy bastamalaryna qoldaý bildirdi. Sonymen qatar, referendýmnyń nátıjesi ultymyz úlken ózgeristerge daıyn ekenin kórsetip berdi. Endigi mindet – halyqtyń osy qalaýyn iske asyrý. Óıtkeni elimizdi jańǵyrtý úshin júrgizilip jatqan reformalar referendýmmen shektelmeıtini túsinikti. Sondyqtan naǵyz jumys endi bastalady desek artyq bola qoımas. Memleket basshysy refrendým qorytyndysy boıynsha jasaǵan úndeýinde osy máselege basa mán berip, elimizdi jan-jaqty jańǵyrtý jalǵasa beretinin aıtty», - dedi M. Áshimbaev Senattyń jalpy otyrysynda.
Bul rette ol zańnamalyq baǵytta atqarylar istiń aýqymy keń, mańyzy zor ekenin atap ótti.
«Prezıdent aıtqandaı, konstıtýtsııalyq reforma búkil quqyq salasyn jańǵyrtýǵa jol ashady. Bul óz kezeginde Parlamentke úlken ári jaýapty mindetter júkteıdi. Konstıtýtsııaǵa engizilgen ózgeristerge sáıkes, zańnamaǵa tıisti túzetýler engizýimiz qajet. Senattyń da jumysyn jetildirý kerek. Jalpy, bizdiń basty maqsatymyz – demokratııalyq, quqyqtyq, ádiletti jáne áleýmettik memleket qalyptastyrý. Osy jolda Senat depýtattary belsendilik tanytyp, «Jańa Qazaqstan» qurý isine úlken úles qosady dep senemin», - dedi Máýlen Áshimbaev.
