Máýlen Áshimbaev: Prezıdent bastamalaryn iske asyrý – halyq bolyp jumylatyn ortaq mindet
«Búgin «Ulttyq múdde» alańynyń alǵashqy otyrysyna jınalyp otyrmyz. Otyrysymyz Prezıdentimizdiń keshegi Joldaýyna arnalady. Joldaýmen bárińiz tanysyp shyqtyńyzdar. Joldaýda Memleket basshysy «Jańa Qazaqstan» qurýdyń naqty saıası baǵdaryn aıqyndap berdi. Prezıdentimiz elimizdiń jarqyn bolashaǵyn qamtamasyz etýge arnalǵan kóptegen mańyzdy bastamalardy kóterdi. Sol sebepti, olardy iske asyrý – halyq bolyp jumylatyn ortaq mindet», - dedi Máýlen Áshimbaev.
Onyń atap ótýinshe, osy Joldaýmen Prezıdentimiz elimizde úlken saıası ózgeristerge jol ashty jáne oǵan tyń serpin berdi.
«Al saıası transformatsııa, eń birinshi kezekte, elimizde ádilettilik qaǵıdatynyń saqtalýyna kepil bolady. Ádilettilik bolmaǵan jerde azamattardyń eline jáne onyń bolashaǵyna degen senimi joǵalady. Bul – memlekettiligimiz úshin úlken qaýip. Qańtar oqıǵasynyń negizgi sabaqtarynyń biri osy ekeni anyq. Sol sebepti, zańnyń tolyqtaı oryndalýyna jáne jalpyǵa birdeı qoldanylýyna qol jetkizý asa mańyzdy. Zań ústemdigi degenimiz sol. Bul, óz kezeginde, tamyr-tanystyqty jáne monopolııany joıýǵa tikeleı yqpal etedi», - dedi ol.
Osy rette Senat spıkeri Prezıdentimiz ózi úlgi kórsetip, birqatar batyl bastamalardy jarııalaǵandyǵyna nazar aýdartty.
«Eń birinshi kezekte bılik monopolııasy joıylmaq. Buǵan qatysty Memleket basshysy elimizdiń sýperprezıdenttik basqarý júıesinen myqty Parlamenti bar prezıdenttik respýblıkaǵa kóshetinin aıtty. Endi Parlament sózsiz, kúsheıedi. Sonymen qatar Senattyń joǵary Palata retinde jumys isteýi durys ári oryndy ekenin aıtyldy. Sonymen qatar eki Palatanyń jumysy men qurylymyna qatysty naqty reformalardy usyndy. Onyń bári qoǵamnyń pikiri men usynystaryna negizdelgenin atap ótken jón», - dedi Máýlen Áshimbaev.
