Máýlen Áshimbaev partııa Saıası keńesiniń otyrysyn ótkizdi
Oǵan Saıası keńes músheleri, sonyń ishinde Qazaqstan Respýblıkasy Parlamentiniń depýtattary, atqarýshy memlekettik organdardyń jáne úkimettik emes uıymdardyń basshylary, kásipkerler, dárigerler, bilim, mádenıet, sport salasynyń ókilderi, Qazaqstan halqy Assambleıasynyń músheleri jáne taǵy basqalar qatysty. Sondaı-aq otyrysqa partııanyń kezekten tys XIX seziniń delegattary da shaqyryldy. Іs-shara barysynda atalǵan sezdiń qaraýyna shyǵarylatyn Qazaqstan Respýblıkasynyń Prezıdenttigine «Nur Otan» partııasynan kandıdat usyný týraly másele talqylanyp, sezdiń jumys organdarynyń quramy pysyqtaldy.
Otyrysty ashqan Máýlen Áshimbaev qazirgi tańda elimizdiń asa mańyzdy tarıhı kezeńdi bastan ótkerip jatqanyna nazar aýdardy.
- Aldymyzda úlken saıası naýqan - Prezıdent saılaýy tur. Elbasymyzdyń tapsyrmasyna sáıkes bul saılaýǵa bizdiń partııamyz da belsendi túrde qatysady. Soǵan baılanysty erteń Elbasy, partııa Tóraǵasynyń qatysýymen partııanyń kezekten tys XIX sezin ótkizip, aldaǵy saılaýǵa qatysatyn kandıdatymyzdy usynamyz, - dedi Máýlen Áshimbaev.
Sondaı-aq ol Qazaqstannyń Tuńǵysh Prezıdenti - Elbasy, partııa Tóraǵasynyń abyroı-bedeli men dana basshylyǵynyń arqasynda «Nur Otan» partııasynyń 20 jyldyń ishinde elimizdegi músheleri eń kóp, jetekshi saıası kúshke aınalǵanyn aıtyp ótti. Sondyqtan partııanyń aldaǵy negizgi mindeti Elbasy saıasatyn ári qaraı jalǵastyrý, soǵan basty kepil bolý jáne Tuńǵysh Prezıdentimiz anyqtap bergen barlyq strategııalyq maqsattarǵa qol jetkizý bolyp qala bermek.
- «Nur Otan» Elbasy anyqtap bergen elimiz úshin mańyzdy qundylyqtar - táýelsizdik, jalpyulttyq birlik, básekege qabiletti qýatty ekonomıka, bilimdi órkendegen qoǵam jáne búkil álem moıyndaǵan bedeldi memleket qurý sııaqty basymdyqtardy saqtaıdy. Osy maqsattarǵa qol jetkizý úshin partııanyń uzaqmerzimdi saıası kóshbasshylyǵyn saqtap, ony ári qaraı nyǵaıtý kerek. Bul - bizge júktelgen úlken jaýapkershilik, - dedi partııa Tóraǵasynyń Birinshi orynbasary.
Sonymen qatar Máýlen Áshimbaev Prezıdent saılaýyna qatysatyn nurotandyq kandıdattyń esimin erteńgi sezde Elbasy aıtatynyna da kóńil bóldi.
- Qazaqstannyń Tuńǵysh Prezıdentiniń usynysymen bizdiń partııamyzdan el prezıdenttigine kandıdat usyný bılik sabaqtastyǵynyń mańyzdy faktory bolyp sanalady jáne «Nur Otan» partııasynyń Elbasy saıasatyn tolyǵymen ári qaraı jalǵastyratynyn kórsetedi, - dedi «Nur Otan» partııasy Tóraǵasynyń Birinshi orynbasary.
Partııa Jarǵysynyń 9.1-tarmaǵyna sáıkes Qazaqstan Respýblıkasynyń Prezıdenttigine partııa atynan kandıdat usyný tek partııanyń joǵary basshylyq organy - Sezdiń sheshimimen júzege asyrylady. Osyǵan oraı atalǵan máseleni sezdiń kún tártibine shyǵarý jóninde partııa Saıası keńesiniń músheleri: Parlament Senatynyń depýtaty Asqar Beısenbaev, partııanyń «Sokolov-Sarybaı taý-ken baıytý óndiristik birlestigi» fılıaly tóraǵasynyń birinshi orynbasary Aleksandr Makarenko jáne «G38» jas kóshbasshylar qory» qoǵamdyq qorynyń jetekshisi Aısulý Ernııazova sóz sóılep, bul jaıttyń mańyzy týraly aıtty. Sonyń nátıjesinde partııa Saıası keńesiniń músheleri Qazaqstan Respýblıkasynyń Prezıdenttigine kandıdat usyný týraly máseleni partııanyń XIX seziniń qaraýyna engizý týraly usynysty qoldap, kóterilgen másele boıynsha Saıası keńestiń Qaýlysy qabyldandy.
Odan bólek, otyrysta kezekten tys XIX Sezdiń jumys organdary - Mandat, Esep, Redaktsııa komıssııalarynyń jáne Sezd Hatshylyǵynyń jeke quramdary qaralyp, usynyldy.
Jıyn sońynda partııa Tóraǵasynyń Birinshi orynbasary erteńgi Sezdiń el damýy úshin mańyzy zor ekenin taǵy bir márte eske saldy.
- Ózderińiz kórip otyrǵandaı, Sezdiń qaraýyna elimizdiń ári qaraı damýy úshin óte mańyzdy máseleler shyǵarylyp otyr. Sondyqtan aldaǵy úlken is-sharalardyń abyroımen ótýine barshamyz bir kisideı atsalysaıyq, - dedi Máýlen Áshimbaev.
Aıta ketken jón, Saıası keńes partııanyń joǵary ókildik organy. Onyń ókilettigine partııa Seziniń sheshimderin oryndaý boıynsha partııa organdary qyzmetiniń negizgi baǵyttaryn anyqtaý, partııanyń qatysýymen bolatyn saılaý naýqandaryna qatysty máselelerdi qaraý, partııa atynan saıası málimdemeler men úndeýlerdi qaraý jáne engizý, qalyptasqan qoǵamdyq qatynasqa baılanysty partııanyń ustanymyn anyqtaý, partııa Tóraǵasynyń usynysy boıynsha óz quramynan partııa Saıası keńesiniń Bıýro múshelerin saılaý, partııa Sezin shaqyrý, olardyń kún tártibin qalyptastyrý, partııaishilik talqylaýlardy ótkizý týraly sheshim qabyldaý, olardy ótkizýdi uıymdastyrý jáne qorytyndylaý, partııa seziniń erekshe quziretine qatysy joq partııa qyzmetindegi basqa da máselelerdi sheshý kiredi. Partııa Saıası keńesiniń ókilettik merzimi - 4 jyl.
