Máýlen Áshimbaev: Parlament depýtattary indetpen kúreske qomaqty úles qosty
NUR-SULTAN. QazAqparat - Senat Spıkeri Máýlen Áshimbaev QAZAQSTAN telearnasyna bergen suhbatynda senatorlardyń jazǵy «kanıkýlda» pandemııamen kúreske óz úlesin qosqanyn habarlady.
Senat Tóraǵasy Máýlen Áshimbaev depýtattyq kanıkýl kezindegi senatorlardyń jumysyna toqtala kele: «Bıylǵy jaz depýtattarymyz indetpen kúreske óz úlesin qosýǵa tyrysty. Depýtattarymyz óńirlerge barǵan kezde Prezıdenttiń tapsyrmalarynyń oryndalýyn baqylady. Memleket basshysynyń qabyldap jatqan sharalaryn halyqqa jetkizýge tyrysty. Dári-dármekterge, medıtsınalyq buıymdarǵa qatysty monıtorıng júrgizip, týyndaǵan máselelerdi memlekettik organdardyń aldyna qoıdy. Óńirlerde depýtattarymyz biraz olqylyqtardy da, problemalardy da kórdi. Sol sebepti sessııamyz bastalǵannan keıin osyndaı olqylyqtar men problemalardy sheshý úshin Úkimetke arnaıy saýaldardy joldaıtyn bolamyz, bul máselelerdi Úkimettiń aldynda kóteremiz»,-dedi.
Sonymen qatar, Máýlen Áshimbaev depýtattardyń aldynda sybaılas jemqorlyqqa qarsy quqyqtyq bazany jetildirý mindeti turǵanyn atap ótti.
Máýlen Áshimbaev: «Biz Prezıdentimizdiń tapsyrmasyna sáıkes sybaılas jemqorlyqqa qarsy quqyqtyq bazany jetildirýimiz kerek. Bul máselege qatysty Prezıdentimiz jaqynda úlken jınalys ótkizdi. Sonda biraz tapsyrmalar berildi. Quqyq qorǵaý organdaryna, basqa memlekettik organdarǵa tıisti zańdarǵa ózgeris engizý kerektigin de aıtty. Sondyqtan biz Bas Prokýratýramen, Úkimetpen, memlekettik organdarmen birlesip tıisti zańdardy qabyldaıtyn bolamyz» - dedi telearnaǵa bergen suhbatynda.
