Máýlen Áshimbaev óńdeý ónerkásibiniń damýyn tejep otyrǵan problemalardy atady
Atalǵan jıynǵa «Báıterek» ulttyq basqarýshy holdınginiń basqarma tóraǵasy Qanat Sharlapaev arnaıy shaqyryldy.
Otyrysty ashqan Máýlen Áshimbaev el Prezıdentiniń Holdıngtiń keıbir enshiles uıymdaryn reformalaý jónindegi tapsyrmalaryna nazar aýdardy.
Senat Tóraǵasy qazirgi tańda Holdıng ekonomıkanyń shıkizattyq emes sektorlaryn ártaraptandyrý jáne damytý, kásipkerlikti jáne óńdeý ónerkásibi ónimderiniń eksportyn qoldaý, agroónerkásiptik keshendi órkendetý jáne halyqty turǵyn úımen qamtamasyz etý sııaqty ekonomıkalyq saıasattyń baǵyttary boıynsha belsendi jumys istep kele jatqanyn atap ótti.
«Óńdeý ónerkásibiniń damýyn tejep otyrǵan birqatar problema bar. Olar – qoljetimdi banktik nesıeleýdiń bolmaýy, jeke ınvestorlar úshin joǵary valıýtalyq táýekelder jáne óndiristik qýattyń ábden tozýy. Sondaı-aq bilikti kadrlar da tapshy. Іshki naryqty qorǵaý úshin tehnıkalyq jáne tarıftik emes retteý aıasynda júıeli jumys joq. Qoljetimdi qarjynyń jetkiliksizdigi ındýstrııalandyrýdy iske asyrýǵa jáne bıznesti damytýǵa negizgi kedergi bolyp qalyp otyr. «Báıterek» holdınginiń quramyndaǵy damý ınstıtýttary osy mindetterdi sheshýi qajet», – dedi Máýlen Áshimbaev.
Otyrys barysynda Klýb músheleri de sóz alyp, Holdıng quramyndaǵy ınstıtýttardyń qyzmetin jetildirý boıynsha óz oılarymen jáne bastamalarymen bólisti. Naqty aıtqanda, sarapshylar «Báıterek» holdınginiń korporatıvti ortalyǵynyń róline, Qazaqstandaǵy óńdeý ónerkásibin memlekettik qoldaýǵa, turǵyn úı saıasatyna, shaǵyn jáne orta bıznesti memlekettik qoldaý sharalarynyń tıimdiligi men qoljetimdiligine jáne taǵy basqa máselelerge toqtaldy.
