Máýlen Áshimbaev oqýshylarǵa arnalǵan jańa ІT-synyptar týraly aıtyp berdi
"Partııa Tóraǵasynyń tapsyrmalaryna sáıkes, 22 jańa jobaǵa bastamashylyq jasalyp, ázirlendi. Olar bizdiń ıdeologııalyq kún tártibimizdi júzege asyrýǵa jáne partııanyń ózin jańǵyrtý baǵytynda jumys istep jatyr. Qazirgi kezeńde tsıfrlandyrýǵa aıryqsha mán berilip otyr, sebebi bul sala elimizdiń básekege qabilettigin arttyrýda mańyzdy ról atqarady. Memleket tarapynan ІT- ónimderdi qurý sharalary belsendi túrde yntalandyrylyp keledi, alaıda olardy paıdalanatyn ári damytatyn orta ókinishke qaraı tıisti deńgeıde daıyn emes. Osyǵan baılanysty partııa Úkimetpen jáne "Atameken" UKP-men, ákimdermen birlese eki jobany iske asyrýdy bastady, ıaǵnı olar tsıfrlyq ortany damytýǵa baǵyttalǵan", - dep naqtylady M. Áshimbaev QR Prezıdenti Nursultan Nazarbaevtyń qatysýymen ótip jatqan «Nur Otan» Saıası keńesiniń keńeıtilgen otyrysynda.
Osy oraıda ol halyqty tsıfrlyq daǵdylarǵa oqytýǵa, el turǵyndaryn ІT ónimderdi paıdalanýǵa tartýǵa, sondaı-aq ІT kadrlardy daıarlaýǵa ekpin qoıylyp otyrǵandyǵyn atap ótti.
"Osy jobalar aınalasynda "Tsıfrlyq Qazaqstan" memlekettik baǵdarlamasyn túsindirý boıynsha partııanyń jumystary júrip jatyr. Bizdiń birinshi joba úsh jyldyń ishinde Tóraǵanyń tapsyrmasy boıynsha bir myń tegin ІT-synybyn ashýǵa arnalǵan. Joba baǵdarlama jasaý men robot tehnıkasyn oqýshylar tarapynan tereńdetip fakýltatıvtik zertteýge arnalǵan. Jyl saıyn osy synyptarǵa 150 myńǵa deıin balalar kele alady", - dedi Áshimbaev.
Onyń sózine qaraǵanda, atalǵan synyptarda bilim berý eýropalyq standarttarǵa sáıkes keletin arnaıy baǵdarlamalar bazasynda ІT- mamandarmen júrgiziledi. Bıyl elimiz boıynsha 280 synypty ashý josparlanyp otyr. Búginde 59 ІT-synyp Aqtóbe, Qaraǵandy, Pavlodar, Mańǵystaý, Qostanaı oblystarynda, sondaı-aq Astana men Almaty qalalarynda ashyldy. Bul sharalar "Týǵan jer" baǵdarlamasy aıasynda demeýshilik kómek esebinen iske asyryldy.
"Al ekinshi joba ІT-mamandardy daıarlaýǵa negizdelgen. Bul turǵyda aqparattyq tehnologııalar salasynda bilikti mamandardyń pýlyn qurýǵa baǵyttaldy. Onyń aıasynda qazaqstandyq ІT-kompanııalar men óńirlik JOO-lar bazasynda 20 ІT-ortalyqty ashýdy kózdelip otyr. Osy oraıda jylyna 35 myńǵa tarta adamdy, onyń ishinde jumyssyz ári ózin-ózi jumyspen qamtyǵan jastardy oqytý eskerilgen", - dedi Máýlen Áshimbaev.
