Máýlen Áshimbaev «Nur Otannyń» jumysyndaǵy ózgerister týraly aıtyp berdi
Sharanyń basty taqyryby eldiń jetekshi saıası kúshin jańǵyrtý boıynsha Elbasynyń tapsyrmalaryn iske asyrý boldy. Partııany jańǵyrtýdyń naqty jospary búginde daıyn. Bul reformanyń basty maqsaty - Qazaqstannyń ekonomıkalyq, saıası jáne rýhanı jańǵyrýyna jan-jaqty qoldaý kórsetýdiń tıimdi tetigin qalyptastyrý. Jıyn barysynda Máýlen Áshimbaev Elbasy tapsyrmasyn júzege asyrýdy qamtamasyz etetin negizgi mindetterdi atap ótti. Birinshiden, partııalyq kadrlardyń básekege qabilettiligin arttyrý máselesine erekshe kóńil bólindi. Soǵan oraı mamandardyń biliktiligi tolyq tekserýden ótkizilmek. Sondaı-aq, partııalyq bilim berý isi de jańa júıege kóshirilmek.
Aldaǵy ýaqyta «Nur Otan» jastarmen jumysty odan ári kúsheıtedi. Odan bólek, joǵary bilikti basqarýshy mamandardy daıarlap, olardyń eń belsendileri men talanttylaryn memlekettik organdarǵa usynatyn bolady. Ekinshiden, partııa tyń bastamalar men ıdeıalardyń negizgi uıytqysy jáne jalpyulttyq kúntártibin qalyptastyrýǵa qatysatyn strategııalyq kúsh bolýy tıis. Nurotandyqtar elimizde bolǵan kez kelgen ótkir de ózekti máselelerge birden nazar aýdaryp, olardyń ońtaıly sheshilýine bar kúsh-jigerin jumsamaq.
«Biz jumys barysy men onyń tásilin ózgertýimiz kerek. Bıýrokratııalyq keleńsizdikter men qaǵazbastylyqty azaıtyp, kreatıvti, partııa jumysyna tyń serpin beretin jańa ádisterge basymdyq berýge tıispiz. Tıimdi ári naqty nátıjeler úshin jumys isteıtin uıymdyq, saıası jáne saraptamalyq ortalyqqa aınalýymyz kerek. Sondaı-aq, Elbasymyzdyń kreatıvti ortalyǵy retinde qalyptasyp, júıeli jumys júrgizýge tıispiz», - dedi Máýlen Áshimbaev.
Jańǵyrý aıasynda ashyq aqparattyq qoǵam jáne tsıfrly Qazaqstan jaǵdaıyna baılanysty partııa óziniń medıa keńistiginde jańǵyrý, jańarý jáne beıimdelý jumystaryn júrgizedi. Internet pen áleýmettik jelige basymdyq beriledi. Óıtkeni bul - qazirgi zamannyń basty talaby. Sondaı-aq, «Nur Otan» strategııalyq qujattar daıyndaýmen aınalysatyn óziniń saraptamalyq ortalyǵyn nyǵaıtyp, qaıta qurady. Sonymen qatar partııa Tóraǵasynyń birinshi orynbasary búginde júzege asyrylyp jatqan barlyq partııalyq jobalardyń ózektiligin saraptaýdy tapsyrdy. Soǵan oraı shaǵyn jáne orta bıznes pen ınnovatsııalyq damýdy qoldaýǵa baǵyttalǵan jańa jobalar qolǵa alynbaq. Respýblıkalyq qoǵamdyq qabyldaý bólmesiniń jumysy da aıtarlyqtaı jandanyp, partııanyń uzaqmerzimdi Damý strategııasy daıyndalady.
Máýlen Áshimbaev partııalyq jańǵyrýdy júzege asyrý kezinde Memleket basshysynyń «partııa - mınıstrlik emes» degen sózine erekshe mán berip, ony esten shyǵarmaýdyń mańyzy zor ekenin atap ótti. Sondaı-aq, ol jańǵyrýdy tolyq júzege asyrý úshin ár partııa qyzmetkeri únemi ózin ózi jetildirip, izdenip, burynǵy ádis-tásilderdi ózgertý kerektigin aıtty.
«Nur Otan» halyq úshin meılinshe ashyq ári qoljetimdi bolýy kerek. Sondyqtan elimizdiń jarqyn bolashaǵy jolynda bizder aıanbaı eńbek etýge tıispiz», - dedi Máýlen Áshimbaev.
Jıyn barysynda partııa hatshylary Ǵabıdolla Ábdirahymov, Farhad Qýanǵanov jáne Qanybek Jumashev sóz alyp, partııalyq jańǵyrýdyń alǵashqy nátıjeleri týraly baıandady.
