Máýlen Áshimbaev: «Nur Otan» Arys turǵyndaryna qajetti barlyq kómek sharalaryn qolǵa alady
«Búgin Túrkistan oblysynyń Arys qalasynda ornalasqan áskerı bólimniń aýmaǵynda jarylys boldy. Memleket basshysy Qasym-Jomart Toqaev tótenshe jaǵdaıdyń zardaptaryn joıyp, jarylystyń sebepterin anyqtaý jáne turǵyndardyń qaýipsizdigin qamtamasyz etý jóninde shuǵyl sharalar qabyldaýdy tapsyrdy. Óńirde oblys ákimi, partııamyzdyń aımaqtyq fılıalynyń tóraǵasy Ómirzaq Shókeev jetekshilik etetin jedel shtab quryldy», - delingen jazbada.
Sondaı-aq Máýlen Áshimbaev bul oqıǵa boıynsha «Nur Otan» partııasynyń belsendi áreketin atap ótken.
«Qazirgi tańda «Nur Otan» partııasynyń aımaqtyq jáne aýmaqtyq fılıaldarynyń ókilderi turǵyndardy qaýipsiz jerge kóshirip, ornalastyrý jumystaryna belsendi qatysýda. Jergilikti jerde partııamyzdyń oblystyq fılıalynyń basshylyǵy ákimdikpen jáne Tótenshe jaǵdaılar departamentimen birlesip oqıǵaǵa qatysty máselelerdi sheshý jumystaryn júrgizýde», - deıdi partııa Tóraǵasynyń Birinshi orynbasary.
Sonymen qatar ol partııanyń Arys turǵyndaryna qajetti barlyq kómek sharalaryn qolǵa alatynyn tilge tıek etedi.
«Bizdiń partııa Arys qalasynyń turǵyndaryna qajetti barlyq kómek sharalaryn qolǵa alady. Azyq-túlikpen jáne kıim-keshekpen qamtamasyz etýden bastap, olardyń ýaqytsha ornalasýlaryna, aldaǵy ýaqytta eldi mekenniń ınfraqurylymyn qalpyna keltirýge deıingi jumystarǵa tikeleı atsalysamyz. Búginnen bastap partııamyzdyń Túrkistan oblystyq fılıaly gýmanıtarlyq kómek jınaý jumystaryn qolǵa aldy. Bul jumysqa partııamyzben birge elimizdegi barlyq bastaýysh partııa uıymdarynyń ókilderi de jumyldyrylady.
Aldymen Arys qalasynyń ár turǵynynyń qaýipsizdigin qamtamasyz etip, keıin jedel túrde oryn alǵan oqıǵanyń sebep-saldaryn anyqtaý qajet dep esepteımin. Bizdiń partııa bul is boıynsha tergeýdiń ashyq ári ádil júrgizilýin talap etedi», - delingen Máýlen Áshimbaevtyń jelidegi jazbasynda.
