Máýlen Áshimbaev Musylman aqsaqaldar keńesiniń bas hatshysymen kezdesti

ASTANA. QazAqparat - Senat tóraǵasy Máýlen Áshimbaev Musylman aqsaqaldar keńesiniń bas hatshysy Muhammed Ábdelsalammen kezdesti. Kezdesý barysynda dinaralyq jáne órkenıetaralyq dıalogty birlesip damytý jospary talqylandy.

Palata spıkeri aldymen, Muhammed Ábdelsalamǵa Astana halyqaralyq forýmyn qoldap, oǵan belsendi qatysqany úshin alǵys aıtty.

Sondaı-aq Máýlen Áshimbaev Aqsaqaldar keńesiniń halyqaralyq arenada beıbitshilik, birlik jáne dinı toleranttylyq ıdeıalaryn dáripteýge qosqan úlesine toqtalyp, keńestiń Álemdik jáne dástúrli dinder lıderleriniń sezine belsendi qatysyp kele jatqanyn aıtty.

«Musylman aqsaqaldar keńesiniń ókildigin ashý Qazaqstan úshin erekshe mánge ıe. Keńestiń jumysy toleranttylyq, beıbitshilik, kelisim sııaqty qundylyqtardy dáripteýge arnalǵan. Jalpy, keńes pen sezdiń maqsattary sáıkes keletinin atap ótken jón. Sondyqtan jańa qurylymnyń jumysy Sezdiń ıdeıalaryn odan ári nasıhattaýǵa úlken úles qosady dep senemiz», – dedi Máýlen Áshimbaev.

Sonymen qatar palata tóraǵasy ótken aptada Mysyrdyń din lıderlerimen bolǵan kezdesýlerdiń qorytyndysyna nazar aýdardy jáne Senattyń aldaǵy jumys josparyn tilge tıek etti.

Óz kezeginde Muhammed Ábdelsalam jahandyq beıbitshilik pen kelisimdi nyǵaıtýda Álemdik jáne dástúrli dinder lıderleri seziniń mańyzdy róli jóninde aıtty.

Sondaı-aq ol konfessııaaralyq jáne órkenıetaralyq dıalogty halyqaralyq deńgeıde dáripteýge Qazaqstan úlken úles qosyp kele jatqanyn atap ótti.