Máýlen Áshimbaev Musylman aqsaqaldar keńesiniń bas hatshysymen kezdesti
Kezdesý barysynda jahandyq dinaralyq jáne órkenıetaralyq dıalogty ilgeriletý jónindegi aldaǵy ózara is-qımyl máseleleri sóz boldy.
Senat spıkeri Muhammed Ábdelsalamǵa bıyl qyrkúıek aıynda Astana qalasynda ótken Álemdik jáne dástúrli dinder lıderleriniń VII sezine qatysqany úshin alǵysyn bildirdi. Sondaı-aq ol Musylman aqsaqaldary keńesiniń álemdegi beıbitshilikti, birlikti jáne dinı tózimdilikti saqtaýǵa qosyp kele jatqan úlesin erekshe atap ótti.
Máýlen Áshimbaev Keńestiń musylman qaýymdastyǵynda beıbitshilikti nyǵaıtý, dinı ekstremızmge qarsy turý jáne dástúrli ıslam qundylyqtaryn dáripteý jolynda aýqymdy jumys atqaryp kele jatqanyn tilge tıek etti.
Sonymen qatar Senat tóraǵasy búginde Qazaqstanda Memleket basshysynyń tapsyrmasymen 2023-2033 jyldarǵa arnalǵan Álemdik jáne dástúrli dinder lıderleriniń sezin damytý tujyrymdamasy ázirlenip jatqanyn aıtty. Bul qujatta forýmdy odan ári damytýdyń naqty qadamdary men kezeńderi belgilenedi.
Óz kezeginde Muhammed Ábdelsalam Álemdik jáne dástúrli dinder lıderleri seziniń bedeli men róline, sondaı-aq Qazaqstannyń álemdegi konfessııaaralyq jáne órkenıetaralyq dıalogty damytýǵa qosyp otyrǵan úlesine nazar aýdardy.
Aıta keteıik, Musylman aqsaqaldary keńesi táýelsiz halyqaralyq uıym. Onyń qyzmeti musylman qaýymdastyqtaryndaǵy beıbitshilikti nyǵaıtýǵa, dinı shıelenisti azaıtýǵa jáne tózimdilikti arttyrýǵa yqpal etýge baǵyttalǵan.
Foto: senate.parlam.kz
