Máýlen Áshimbaev: Muqaǵalı shyǵarmalaryn dáripteý - búgingi býyn men keler urpaqtyń abyroıly mindeti

NUR-SULTAN. QazAqparat – Muqaǵalı Maqataevtyń shyǵarmalaryn dáripteý - búgingi býyn men keler urpaqtyń abyroıly mindeti. Mundaı pikirdi QR Parlamenti Senatynyń tóraǵasy Máýlen Áshimbaev bildirdi, dep habarlaıdy QazAqparat tilshisi.

«Búgin qazaqtyń aqıyq aqyny Muqaǵalı Maqataevtyń týǵanyna 90 jyl tolyp otyr. Bul – ádebıetimiz úshin ǵana emes, tutas rýhanııatymyz úshin ataýly data. Sebebi, Muqaǵalı – ulttyq bolmysymyzdy óleńmen órgen birtýar talant ıesi», - dep jazdy Senat spıkeri Instagram paraqshasynda.

Onyń atap ótýinshe, aqynnyń shyǵarmalarynda qazaqy boıaýdyń qalyń ekenin ańǵarý qıyn emes. Shyn máninde, óleńderinen ulttyq rýhtyń lebi erkin seziledi.

Sol sebepti de Muqaǵalıdiń jyrlary ár oqyrmannyń júregine jol taba bildi.

«Men – taýlyqpyn!» dep, Han Táńirinen shabyt alǵan aqynnyń óleńderi de qazirgi tańda qazaq poezııasynyń asqar shyńyna aınalǵany anyq. Sondyqtan halqyn, tilin, Otanyn úsh baqytyna teńegen Muqaǵalıdiń shyǵarmalaryn dáripteýdiń qashanda mańyzy zor. Bul, ásirese, búgingi býyn men keler urpaqtyń abyroıly mindeti bolýǵa tıis», - deıdi Máýlen Áshimbaev.