Máýlen Áshimbaev: Memlekettiń áleýmettik qoldaýy patronattyq kóńil-kúıdi týǵyzbaýy tıis

ASTANA. QazAqparat - Memleket júzege asyryp jatqan barlyq áleýmettik sharalar paketi qoǵamda patronattyq kóńil-kúıdi týǵyzbaýy kerek. OKQ-da «Halyqqa kómek» jobasynyń bastalýyna qatysty ótken baspasóz máslıhatynda Nur Otan partııasy tóraǵasynyń birinshi orynbasary Máýlen Áshimbaev osylaı dedi, dep habarlaıdy QazAqparat tilshisi.

Máýlen Áshimbaevtyń aıtýynsha, Memleket basshysy partııanyń sońǵy sezinde 4 jalpulttyq jobany, atap aıtqanda «Baqytty otbasy», «Halyqqa kómek», «Qutty meken», «Aýyl - el besigi» jobalaryn júzege asyrýdy tapsyrǵan. Osyǵan oraı, atalmysh jobalar Nur Otan partııasy jumysynyń erekshe nazarynda bolady.

«Memleket júzege asyryp jatqan barlyq áleýmettik sharalar paketi, búkil shara - masyldyq pen bizdiń qoǵamda patronattyq kóńil-kúıdi týǵyzbaýy kerek. Qalaı bolǵanda da, memleket pen qoǵamnyń resýrsy shekteýli ekenin túsingen jón. Eger azamattar jumys istemese, memlekettik organdardyń kómegine ǵana ıek artyp otyrsa - bul eshqandaı jaqsylyqqa aparmaıdy. Jumys isteýge múmkindigi bar adamdar ekonomıkanyń jáne qoǵamnyń damýyna úles qosyp, eńbek etip, ulttyq ál-aýqatty kóterýge qoldaý kórsetýi kerek», - deıdi Máýlen Áshimbaev.

Onyń aıtýynsha, masyldyq kóńil-kúı jaılasa, munyń arty tereń áleýmettik daǵdarysqa alyp keledi.

«Sebebi, resýrstar qoǵamnyń qoldaýymen jınalady. Múmkindigi shektelýi azamattardy qoldaý úshin bıýdjette qarajat bolýy kerek. Bıýdjet tolymdy bolý úshin salyq túsip turýy tıis. Salyq - kásiporyndar jumys istep tursa ǵana túsedi. Bul - naqty model», - deıdi Máýlen Áshimbaev.

Eske sala ketsek, buǵan deıin Nur Otan partııasynyń biryńǵaı áleýmettik tereze júıesinde qyzmet kórsetetin «Halyqqa kómek» jobasy óz jumysyn bastaǵanyn habarlaǵan bolatynbyz.